Астрахань-Атырау пойызында нәресте дүниеге келді

Отандық жолсеріктер тағы бір баланың кіндік әке-шешесі атанды. Демалыс күндері №626 «Астрахань-Атырау» жолаушылар пойызында балпанақтай қыз бала дүниеге келді, деп хабарлайды Rail-news.kz.

Оқиға желісіне келсек, Кенжегүл Қайырболатова есімді жүкті әйел Ганюшкинодан Атырауға бесінші вагонмен келе жатқан. Құрам Ганюшкино станциясынан жөнелтілгеннен кейін таңғы сағат 5-те «Аққыстау- Атырау» аралығында Кенжегүлдің толғағы басталады. Пойыз бастығы Сәуле Ілиясова бастаған жолсеріктер шұғыл түрде тиісті әрекеттерге көшіп, нұсқаулыққа сәйкес машинистке хабарлап, жедел медициналық жәрдем бригадасын жақын маңдағы станцияға шақыртады. Алайда, толғақ жиілей түседі. Барлық жағдайға дайын болуға бел буған жолсеріктер Мырзагүл Қаражігітова, Марияш Оразғалиева және Лаура Камалова көп ұзамай жас анаға көмек көрсетіп, сағат 05:30-да қыз баланың жарық дүниеге аман-есен келуіне себепші болады.

Жолаушылар тасымалында 15 жыл жұмыс істеп келе жатқан Сәуле Ілиясова мұндай жағдайға алғаш рет тап болып отырғанын айтады.

– Компаниямызда стандартты емес жағдайларда әрекет етуге үйретеді және біз әрқашан жолаушыларға көмек көрсетуге дайын болуымыз керек, осыған дейін пойызда дүниеге келген балаға кіндік шеше болған әріптесерімізге қызыға қарап жүретінбіз, міне, өз басымызға да келіп, біз де қызды болдық, – деп күлді телефонмен хабарласқанымызда Сәуле Ілиясова.

Атырау станциясында жаңа туған сәбиді анасымен бірге «жедел жәрдем» көлігі күтіп алған. Өз кезегінде, Кенжегүл Қайырболатова дер кезінде көмек көрсеткен барлық жанға шексіз алғысын білдірді.