Жол-көлік оқиғасы азаймай тұр...
«Қазақстан теміржолшысы» газетінің тілшісі
Жыл басынан бері еліміздің магистральдық желі бойындағы теміржол өткелдерінде 16 жол-көлік оқиғасы тіркелген. Автокөліктердің пойызбен соқтығысу салдарынан жылжымалы құрам 2 рет жолдан шығып кеткен.
Барлық апаттың себебі біреу – автокөлік жүргізушілерінің жол қозғалысы ережелерін өрескел бұзуы. Осыған байланысты Магистральдық желі дирекциясы көлік жүргізушілерімен және автошаруашылық басшыларымен теміржол өткелдерінде ереже бұзушылықты болдырмау үшін алдын алу жұмыстарын жүргізіп келеді. Мәселен, «Назар аударыңыз – өткел!» тақырыбында қауіпсіздік айлықтары өткізіліп, теміржол өткелдерінде аншлагтар орнатылған, сондай-ақ, жүргізушілерге теміржол өткелдері арқылы өту ережелері егжей-тегжейлі түсіндірілген буклеттер таратылып тұрады. Өткен алты ай ішінде 371 автошаруашылықта жиындар өтіп, 77 221 жүргізуші магистральдық желіні кесіп өту ережелерімен танысты.
«Алайда, Дирекция қабылдап жатқан шаралар біз күткен нәтиже бермей отыр, автокөлік жүргізушілері мен бөгде адамдар темір жолдарда қауіпсіздік ережелерін бұзуды тоқтатар емес. Осылайша, олар өз өмірлеріне ғана емес, өзгенің де өміріне қауіп төндіруде. Олардың бұл әрекеті «Әкімшілік құқық бұзушылық туралы» ҚР Кодексінде қарастырылған әкімшілік құқық бұзушылықтар жиынтығын құрайды», – дейді Магистральдық желі дирекциясы директорының қауіпсіздік жөніндегі орынбасары Бахытбек Алдажаров.
Оның айтуынша, жол-көлік оқиғаларының 3 жағдайында автокөліктің тежегіш жүйесі істен шыққан. Жалпы жол-көлік оқиғаларының өткелдерде пойыздар кідірісіне алып келетіні өз алдына, Компания инфрақұрылым мен жылжымалы құрамның зақымдалуына байланысты айтарлықтай қаржылық шығынға ұшырап отыр. Мысалы, өткен жылы Арқалық-Шұбаркөл учаскесінде КАМАЗ автокөлігімен соқтығысқаннан кейін локомотивті қалпына келтіру шамамен жарты миллиард теңгені құраған.