Бельгиямен ынтымақтастықта ТХКБ дамыту мәселесі қаралды
«Қазақстан теміржолшысы» газетінің тілшісі
Еліміздің Индустрия және инфрақұрылымдық даму министрі Қайырбек Өскенбаев Бельгия Корольдігі премьер-министрінің орынбасары, көлік министрі Джордж Гилькинемен кездесіп, алдағы жылға арналған жоспарларды, Транскаспий халықаралық көлік бағдары мен көлік қатынасын дамыту мәселелерін талқылады.
Кездесуде жүк транзитінің перспективасы мен экономиканы қарбонсыздандыруға қатысты мәселелер де қарастырылды. Бұл ретте қазір Транскаспий халықаралық көлік бағдары бойынша жүк ағындарын ұлғайту мен дамыту мақсатында Қазақстан, Әзербайжан, Грузия, Түркия, Украина, Румыния, Польша, сондай-ақ Қытайдың магистральдық инфрақұрылым иелері және көлік түрлерімен жүк тасымалын іске асыратын ұйымдарды біріктіретін «ТХКБ» Халықаралық қауымдастығы құрылғанын айта кету керек.
«Ақтау және Құрық теңіз порттары арқылы өтетін Транскаспий халықаралық көлік бағдары қазақстандық экспорт пен транзиттік жүктерді тасымалдаудың негізгі бағыты саналады. Аталған бағытта транзиттік контейнерлік тасымалдардың көлемі 2021 жылдағы көрсеткішпен салыстырғанда 81%-ға артып, 14,7 мың контейнерге жетіп отыр», – деді Қайырбек Өскенбаев.
Жыл сайын қатысушы елдер ТХКБ дамыту жөніндегі жұмыс тобының отырыстарында кемемен жүк тасымалдаудың алдағы жылға арналған қолайлы тарифтік мөлшерлемесін қарастырып, бекітіп отыратыны белгілі. Тариф мөлшерлемесін сақтау қауымдастыққа мүше барлық тасымалдаушы операторларға ортақ шарт.
Министрдің айтуынша, ТХКБ-ның қарқынын арттыру үшін 2022-2027 жылдарға арналған «тар» орындарды біртіндеп жою мен аталған халықаралық маршрутты дамыту жөнінде Жол картасы әзірленді. Бұл шаралар 2025 жылға қарай осы дәліздің өткізу қабілетін жылына 10 млн тонна жүкке дейін ұлғайтуға мүмкіндік береді деп болжануда.