Мыңнан астам маман қайта даярланды

Тараз теміржол көлігі оқу орталығында осы жылы 1021 маман біліктілігін көтеріп, қайта даярлаудан өтті.

Оқу орталығының директоры Тұрсынғали Нұрсейітовтің айтуынша, бұған дейін жылына екі мыңның үстінде теміржолшыларды қайта даярлаудан өткізетін білім ордасының жұмысына кешегі пандемия аз болса да кері әсерін тигізген. Дегенмен, келесі жылы 2688 маманды дайындауға өтінім алып отыр екен. Оқу орталығына Алматы, Түркістан, Абай және Жамбыл облыстарынан теміржолшылар келеді. Орталықта өз салаларына маманданған 17 жоғары білікті қызметкер дәріс береді. Оқу-әдістемелік құралдар – «Азаматтық-өндірістік мінездемемен» (ГПХ) мақұлданған оқулықтар. Негізгі басымдық электровоз, тепловоз машинистерін қайта даярлауға, өндірістік қауіпсіздікті еңсеруге беріледі.  

– Біліктілігін көтеретін теміржолшылар еңбек өтіліне қарай мекемелерден жіберіледі. Оқу мерзімінде олардың айлық жалақысы сақталады, өндірістік қауіпсіздік бойынша мамандар үш ай оқыса, электровоз және тепловоз машинистері 6 ай дайындалады. Олар Тараздағы Жамбыл жол, белгі беру және байланыс, электрмен жабдықтау дистанцияларындағы полигондарда және орталықтағы тренажер алаңында сынақтардан өтеді. Барлық жағдай жасалған. 70 адамға арналған жатақхана, спорт залы, арнайы жасақталған шахмат, дойбы, теннис үстелдері бар. Курсанттар бос уақытында спортпен айналысады, – дейді он жылдан астам осы орталықты басқарып отырған Тұрсынғали Абдалыұлы.

Ол – еңбек жолын Тараз локомотив депосында машинистің көмекшісі болып бастап, осы саланың барлық сатысынан өткен білікті маман.