Жаңатаста теміржол мекемелерінің ғимараттарында жарық жоқ
Тараз қаласы бойынша меншікті тілші
Жамбыл облысында ауа райының күрт өзгеруіне орай жолда қалған жолаушыларды пойызбен жеткізу жұмыстары жалғасып жатыр, деп хабарлайды Rail-news.kz.
Жамбыл магистральді желі бөлімшесі директорының орынбасары Бейбіт Садықбековтың айтуынша, бүгін №77 «Алматы – Маңғыстау» жолаушылар пойызына жолсеріктермен келісіп 30 адамды салып жіберіпті.
«Қазір №71 «Нұрлыжол – Шымкент» жолаушылар пойызы келе жатыр. Онда орын болғандықтан жолаушылар билет алып, орналасатын болады» - деді ол.
Ал, Жамбыл бөлімшесінің Бас инженері Дүйсен Сыдықов Жаңатаста әлі жарық жоқ екендігін алға тартып, дизельді генераторларға дрезиналармен жанар-жағармай тасымалданып отырғанын айтты.
– Жаңатаста теміржол мекемелерінің ғимараттарында жарық жоқ, жылу жоқ. Дизельді генераторлармен отыр. Ал, Қаратау станциясындағы теміржолға қарасты үш ғимараттың шатыры ұшқан. Жарық жоқ, жылу бар. Қала берді Қаратау – Жаңатас теліміндегі Электрмен жабдықтау дистанциясына қарасты 20 шақты бағана құлаған. Қазір соларды қалпына келтіру жұмыстары жүргізілуде, – дейді Дүйсен Тұрсынбайұлы.