Даңқты теміржолшының немерелері Ресейден арнайы келді
Тараз қаласы бойынша меншікті тілші
Тараз көлік және коммуникация колледжіне осы кәсіптік оқу орнының түлегі, даңқты теміржолшы болған Сергей Египконың немерелері Ресейдің Самара қаласынан арнайы келіп, қонақ болды.
Сергей Египконың немерелері Елена мен Сергей аталарының еңбек жолымен танысып, балалық шақтарында аталарына қонаққа келгенде өздері куә болған қызықты оқиғаларды еске алды.
Сергей Египко – паровоз машинисі мамандығы бойынша 1936 жылғы ФЗУ мектебінің түлегі. 1941 жылы майданға аттанып соғысқа қатысады. Ал 1946 жылдан бастап ЖУ-1-де оқу-өндіріс шебері, № 88 қалалық кәсіптік техникалық училищесінде аға шебері болып жұмыс істеді. Ұлы Отан соғысының ардагері, ҚазССР Жоғарғы Кеңесінің Құрмет грамотасымен марапатталған, ҚазССР-нің «Кәсіптік білім беру саласының үздігі» атанған тәлімгер.
Сол кездегі училищеде шығармашылық үйірмесіне жетекшілік еткен Сергей Яковлевич шәкірттерімен бірлесе отырып, Ұлы Отан соғысының 40 жылдығына орай металл бұйымның бетіне Ұлы Отан соғысының жауынгері бейнеленген ескерткіш жасаған. Қазіргі таңда бұл шығармашылық жұмыс колледждің мұражайында орын алған.
Сондай-ақ, Сергей Яковлевичтің ұлы Константин да әкесі оқыған, қызмет еткен оқу орнында суретші болып жұмыс істеген. Немересі Елена Константиновнаны әкесінің де өткен өмір жолы қызықтырып, салған суреттерімен қауышуда. Ресейден келген жас саяхатшылармен кездескен колледж ұжымы олардың сапарына қолдау білдіріп, сәттілік тіледі.