Балым Елеусінова: «Теміржол – біздің бағымыз»
«Қазақстан теміржолшысы» газетінің тілшісі
Балым Елеусінова – Астана локомотив пайдалану депосының құжаттарды өңдеу операторы. Мақаттық Құрметті теміржолшы Тасмағамбет Қайрановтың қызы. «Ұяда не көрсең, ұшқанда соны ілерсің» демекші, аға-әпкелері сияқты теміржол саласын таңдауына әке ықпалы болса керек.
Мектеп бітірген соң бірден Алматы теміржол институтына түседі. Жоғары оқу орнын бітірген соң өзі сияқты теміржол әулетінен шыққан Амангелді Елеусіновпен отбасын құрады. Алматыда локомотив шаруашылығында жұмыс істеп, тәжірибе жинайды.
1998 жылы ҚТЖ Алматыдан Астанаға қоныс аударғанда Амангелді мен Балым Елеусіновтер де жұмыс бабымен бас шаһарға көшіп келеді. Балым Астана локомотив пайдалану депосының жедел техникалық есептеу орталығына жұмысқа кіріп, бүгінгі таңда алып салада еңбек етіп келе жатқанына 30 жылдан асыпты.
«Менің қызметім машинистер маршрутын санаумен қатар жағылған отынды, майдың есеп-қисабын компьютерге енгізу, электронды маршруттарды өткізу. Күн сайын 20-30 маршурт жасап, ай соңында бір айдың қорытындысы бойынша есеп береміз. Отынды есептеуші техниктер жанар-жағармай, дизель отыны қаншалықты жұмсалды немесе үнемделді, соны есептеп бізге береді, біз оларды өңдейміз. Бұл жерде біз қателеспеуіміз керек. Өйткені, бұл – машинистер еңбегі. Біз өңдеген құжаттар локомотив бригадаларының жалақысын, сыйақысын, тағы басқа үстеме ақыларды есептегенде негіз болады. Сондықтан біздің жұмыстың да өзіндік тәртібі мен жауапкершілігі бар», – дейді Балым Елеусінова.
Балымның жолдасы Амангелді көп жыл теміржолда жұмыс істеп, кейінгі уақытта теміржол саласындағы жекеменшік компанияға жұмысқа ауысыпты. Ұлдары Абай да М.Тынышпаев атындағы Қазақ көлік және коммуникация академиясын бітірген, машинист болып еңбек етті, қазір жекеменшік компанияға жұмыс орнын ауыстырыпты. Үлкен қызы Ботагөз құрылыс компаниясында қаржыгер болса, кенжесі Аружан студент.
Балым туралы әріптестері өз ісіне тиянақты, салмақты, артық сөзі жоқ, өз ісін жетік меңгерген маман деп жылы лебіздерін білдіреді. Ал Балым болса, теміржол – біздің бағымыз, туған-туысымның бәрі дерлік теміржолшы, осы кәсіптің нанын жеп отырған әулетпіз дейді.
«Кезінде Атырауда туып-өсіп, Алматыда оқыдық, одан Астанада қызмет жасап, өмір сүріп өсіп-өніп жатқанымыз алланың сыйы, балаларымыздың бағы шығар. Осылар оқысын, үлкен қалада өмір сүрсін деп кезінде Алматыға табан тіреуге тырыстық. Жұрт жаппай жаңа астанаға көшіп, арқаға қоныс аударғанда жүрексінбей біз де тәуекел еттік. Бүгінде міне, ерорданың тұрғынымыз, шүкір», – дейді қанағатшыл қазақ әйелі.