Түркия Ақтау портын дамыту жобаларына қызығушылық білдірді
«Қазақстан теміржолшысы» газетінің тілшісі
Ақтау портына Түркия Республикасының Ақтау қаласындағы жаңадан тағайындалған консулы Альптекин Сабри бастаған Түркия Бас консулдығының делегациясы келді.
Кездесу барысында тараптар екі ел арасындағы сауда-экономикалық ынтымақтастықты одан әрі кеңейте түсуге басымдық берді. Бүгінде Қазақстанның бірден-бір портты аймағы Маңғыстау облысының Түркия Республикасымен сыртқы сауда айналымы жылдан-жылға артып келеді. Өткен 2022 жылы 73,7 млн АҚШ долларын құраса, түрік капиталының қатысуымен экономиканың түрлі салаларында 86 кәсіпорын тіркелген.
Кездесуде сондай-ақ мәртебелі меймандар түрік көліктік-логистикалық компанияларының Ақтау портын дамытудың болашақтағы жобаларына қатысу мүмкіндігіне қызығушылық білдірді.
Айта кетейік, Түркия мен Қазақстан арасындағы іскерлік, мәдени және бауырластық қарым-қатынастардың қарқын алғанына отыз жылдан асты. Биыл наурыз айында Қазақстан Президенті Қасым-Жомарт Тоқаев Түркияға жұмыс сапары аясында өткен кездесу барысында Түркия – Қазақстанның басты бес сауда серіктесінің қатарына кіретінін атап өтті. Былтыр екі ел арасындағы сауда айналымы 33 пайызға өсіп, 6,3 миллиард долларға жеткен.