Жұмысты қорытындылады

Жаңалықтар

11.04.2017, 15:52

Жуырда Семей магистральдық желі бөлімшесінің ҒТА және талдау орталығы алқалы кеңес өткізіп, ағымдағы тоқсан барысындағы атқарылған жұмыстарды, алдағы межелі шараларды сарапқа салды. Басқосуға желі бойындағы барлық мекемелер бойынша техникалық информаторлар қатысып, өзара ортақ мәселелерді талқылады. Жиын барысында қазіргі күнге дейінгі атқарылған шаралар сынға түсті. Орталық басшысы Қайырғазы Жармұхамбетов айтып өткендей, алғашқы тоқсан бойынша жоспар 120 пайызға орындалған. Яғни, берілуі тиіс 10 ұсыныстың орнына 17 рационализаторлық ұсыныс түсіп, оның 12-сі екінші деңгейлі техникалық кеңес қарауынан өтіп, мақұлданыпты. Ал экономикалық тиімділік бойынша 1 млн 810 мың 300 теңгенің жалпы кірісі көзделуде. Оның ішінде Аягөздегі ТЧЭ-25 мекемесінің қосып отырған қомақты үлесі бар екен. Сонымен қатар, өндіріске техникалық жаңашылдық енгізу бойынша жылдық жоспар көрсеткіші 42 болуы тиіс. Алғашқы тоқсан ішінде – 6. Алайда, бүгінде жалпы саны 12 жаңашыл тәсіл өндіріске енгізілген. Бұл, сөз жоқ жоғары көрсеткіш. Сондай-ақ, жиын барысында өткен 2016 жылдың қорытындысына да шолу жасалынып, жетістіктер аталып өтті. – Осы жолы «Үздік рационализатор» аталымына үміткерлікке 6 теміржолшы ұсынылып отыр. Оның ішінде ЭЧ-18 мекемесі бойынша үш адам бар. Сондай-ақ, ПЧ-40, ВЧД-23 және ШЧ-28 бойынша бір-бір теміржолшының тың идеялары Астанаға жіберілген. Өнертапқыштарымыздың жаңашылдықтары бірінші деңгейлі техникалық кеңес талабынан табылып, мақұлданар болса, өндіріске әкелген тиімділіктерін өзге әріптестері арасында насихаттауға кеңінен мүмкіндік ашылады, – дейді Семей магистральдық желі бөлімшесінің ҒТА және талдау орталығының басшысы Қайырғазы Жармұхамбетов. Жалпы, бүгінгі күндері Семей теміржолы бойынша «Үздік рационализатор» төсбелгісін иеленген локомотившілер Талғат Садықов пен аягөздік Асхат Маженовтер әріптестеріне үлгі болуда.

Жұмысты қорытындылады

Басқа да жаңалықтар

Қазақстан теміржолшысы газеті, №54 17 шілде 2026 жыл