Әлеуметтік көмірге бақылау күшейеді
«Қазақстан теміржолшысы» газетінің тілшісі
Коммуналдық-тұрмыстық қатты отынның жетіспеушілігін болдырмау мақсатында әлеуметтік көмірді автокөлікпен және теміржол көлігімен әкетуге шектеу енгізілмек. Бұл туралы Үкімет отырысында Индустрия және инфрақұрылымдық даму министрі Марат Қарабаев айтты.
Себебі әлеуметтік көмірді бизнес субъектілеріне сату фактілері анықталған.
– Өткен кезеңдегі тәжірибе көрсеткендей, жылу маусымы қызған шақта әлеуметтік көмірдің сату нүктелерінен тыс шығарылу фактілері орын алған. Мәселен, еліміздің 5 өңірінде 400 мың тоннаға жуық көмір шетке кеткен. Әкімдіктер тарапынан бақылаудың болмауына байланысты бірқатар өңірлік операторлар әлеуметтік көмірді мақсатсыз, яғни бизнес субъектілеріне сата бастаған, – деді Индустрия министрі.
Министр алдағы жылыту кезеңінде коммуналдық-тұрмыстық көмірдің жетіспеушілігін болдырмау мақсатында көмір өндіруші кәсіпорындарды қоспағанда, көмірді автокөлікпен және теміржол көлігімен әкетуді шектеуге бағытталған алдын алу шаралары қабылданып жатқанын жеткізді. 2022-2023 жылыту маусымы аяқталуға жақын. 2022 жылдың қорытындысы бойынша 113,9 млн тонна көмір өндірілген. Бұл 2021 жылдың көрсеткішінен 2 пайызға көп. Биылғы жылу маусымына халық пен коммуналдық-тұрмыстық сектор үшін көмірдің жоспарлы қажеттілігі шамамен 9 млн тоннаны құрады. Өңірлерге қатты отын толық көлемде жеткізілді.