Ақтау портында ТЖ бойынша оқу-жаттығу өтті
«Самұрық-Қазына» және ҚТЖ Ақтау портында ТЖ бойынша оқу-жаттығулар өткізді, деп хабарлайды Rail-news.kz.
Оқу-жаттығулар өндірістегі қауіпсіздік жүйесін жетілдіру үшін ұйымдастырылды. Апатқа қарсы жаттығу мұнай өнімдерін тасымалдайтын Ақтау порты аумағында болды. Порт, «Қазақстан Темір Жолы» және «Самұрық-Қазына» қызметкерлері мұнай төгілуінің алдын алу бойынша бағдарламадан өтті. Мұнай төгілуінің мүмкін орны арнайы тосқауылдар көмегімен оқшауланды.
«Самұрық-Қазына» АҚ қоғаммен байланыс, әлеуметтік-еңбек қатынастары және еңбекті қорғау жөніндегі басқарушы директоры Ғибрат Ауғанов атап өткендей, бұл жұмыс Қор тобының өндірісте болуы мүмкін төтенше жағдайларға әрқашан дайын болуы үшін алдағы уақытта да жалғасын табады.
Өндірістегі қауіпсіздікті күшейту үшін «Самұрық-Қазына» компаниялар тобы қауіпті өндірістік объектілерде үнемі тактикалық жаттығулар өткізеді. Сәуірде Үлбі металлургия зауытында төтенше жағдай бойынша оқу-жаттығулар пысықталды. Ал қазанда «ҚазТрансОйл» компаниясы кезекті жаттығу жұмыстарын өткізді.