Электромеханиктер тәжірибе алмасты

Темір жолдың ажырамас бір бөлігі – электрмен қамту саласы. Бағдаршамдар мен бағыттамалы бұрмалар жұмысы, ғимараттардағы бүкіл автоматтандыру қызметтері электр қуатына тәуелді. Ал электр қуатының үздіксіз беріліп тұруын қамтамасыз ететін – электромеханиктер. Сондықтан олардың біліктілігі – маңызды мәселе.

Жуырда Атырау электрмен қамту дистанциясында электромеханиктер мен энергодиспетчерлерге арналған семинар-мәжіліс өтті. Ондағы мақсат – өндіріс барысында қауіпсіздікті сақтау, қуат көзін тарату жұмыстарын дұрыс ұйымдастыра білу, тәжірибе алмасу. Семинарға Атырау қаласы мен аудандық торап электромеханиктері мен энергодиспетчерлері, барлығы 20 шақты адам қатысты.  

Семинар барысында «Трансформаторларды, қуат бағандарын кешенді тексеру және жөндеу», «Қосалқы трансформаторлардың жағдайын тексеру», «Электр қондырғылары жұмысындағы қауіпсіз жұмысты қамтамасыз етуді ұйымдастыру және техникалық шаралары», «1000 вольтқа дейінгі және одан жоғары электрқондырғыларына қатысты жеке қорғаныш құралдары мен олардың қолдану мерзімдері», т.б. тақырыптарда баяндамалар тыңдалып, түстен кейін сол баяндамалар негізінде практикалық сабақтар өтті.

 Дистанцияның бас инженері Абай Есқалиевтің айтуынша, Сағыз бен Д.Нұрпейісова аралығындағы 860 шақырымды қамтитын дистанция бүгінде толық қуатымен жұмыс жасап келеді. «Бұрын бізде жеке сектордағы абоненттер көп болатын, қазіргі уақытта олардан біртіндеп арылып, «Атырау-Жарық» АҚ сынды басқа да компаниялардың теңгеріміне берілуде. Енді тек темір жол нысандарына ғана қызмет көрсететін боламыз. Бұл біз үшін тиімді, өйткені «ортақ өгізден оңаша бұзау» дегендей, бұрынғыдай қосымша шығын жоқ. Өз қуатымызды өз нысандарымызға ғана жұмсаймыз. Аудандық тораптарда резервтік фидерлерді көбейтіп жатырмыз. Ол ешкімге тәуелсіз, дербес жұмыс жасауға қолайлы» дейді ол.  

Семинарға келген мамандар бір-бірімен пікір алмасып, білмегендерін сұрап, білгендерін көрсетіп, тәжірибелерімен бөлісті.