Бірыңғай стандарт талабы сөз болды (Фото)

Астана белгі беру және байланыс дистанциясында жұмыс орындарындағы санитарлық-тұрмыстық жағдайды жақсарту, ғимараттар мен құрылымдарды бірыңғай стандартқа келтіру туралы семинар өтті.

Семинарға «ҚТЖ» ҰК» АҚ «Магистральдық желі дирекциясы» филиалы Автоматика, телемеханика және телекоммуникация департаменті директорының орынбасары Аманжол Амринов пен Ақмола магистральдық желілер бөлімшесінің бас инженері Анатолий Абдрахманов және дистанция басшылары мен қызметкерлері қатысты. 

ШЧ-16 мекемесінің директоры Артур Сәрсенғалиев семинар тақырыбына сай дистанцияда атқарылған жұмыстарға тоқталды. 92 жылдық тарихы бар дистанцияның балансында 54 ғимарат бар екен. Электрлік орталықтандыру құрылғыларымен 12 станция қамтылған, атап айтқанда мұндай құрылғылар Астана, Нұр-Сұлтан-Нұрлы жол, Қырқыншы, Сарыоба, Еркіншілік, Едіге, Өндіріс, Жайнақ, Қосшекі, Тастақ, Қараадыр станциялары мен Техникалық паркте бар. Жалпы барлығы 567 бұрманың жұмысына жауапты. Сонымен қатар 811 бағдаршам, 20 өткел, 565,003 км белгі беру кабельдерінің жұмысын қадағалайды.  

– Бұған дейін Астана станциясы торабы бойынша санитарлық-тұрмыстық бағыттағы нысандарында қауіпсіз және талапқа сай жағдай жасау бойынша 12 әкімшілік және өндірістік нысан анықталған еді. Мекеменің барлық ЭО қосындарында ас ішу бөлмелері бар, солардың бәрінде жөндеу жұмыстары жүргізілді. Гараж ғимаратындағы киім ауыстыру және душ қабылдау бөлмелері де косметикалық жөндеуден өтті. Цехтар мен әкімшілік ғимаратта тиісті жұмыстар жүргізіліп, керек жиһаздар мен тұрмыстық техникалар алынды, Барлық ғимаратты бірыңғай стандарт талабына сәйкестендіру жүріп жатыр, – деді дистанция басшысы.  

Былтыр үшінші тоқсанда жұмысшылардың өз күшімен әкімшілік, гараж және т.б ғимараттардың сыртын эстетикалық түрге келтіру бойынша ауқымды жұмыс атқарылыпты. Барлық жұмыстар үш кезеңге бөлінген. Бірінші – материал қажет етілмейтін жұмыстар, екінші – материалдары жеткілікті жұмыстар және үшінші материалдар сатып алуды қажет ететін жұмыстар. Дистанция басшысы осы кезеңдер бойынша атқарылған жұмыстарды толық баяндап шықты.  

– Әр жұмыс кезеңі бойынша міндет етіп қойылған тапсырмалар түгел орындалды. Атап айтқанда, қақпаларды сырлау, бокстарды нөмірлеу, дистанция атауы жазылған маңдайша жазуларды жаңарту, мекемелер алдындағы аулада қурап қалған бұталарды кесу, істен шыққан техникаларды өткізу сияқты ұсақ-түйек жұмыстарға дейін мән берілді. Жалпы дистанция аумағынан 15 көлік қоқыс шығарылды, – деді дистанция директоры.  

Семинар соңында қатысушылар дистанцияның іші мен сыртын аралап, атқарылған жұмыстармен танысып шықты.