Семейлік теміржолшылар жаңашыл тәсілдерді сынақтан өткізуде
Абай облысы бойынша меншікті тілші
Биылғы жарияланған «Техникалық оқу жылы» аясында семейлік теміржолшылар кәсіби машықтарын дамытып қана қоймай, өзара тәжірибе алмасып, қызмет барысындағы түрлі жағдаяттар бойынша дәріс сағаттарын өткізуде.
Бұл орайда әрбір тораптық станция қызметкерлерінің ұсынған әдістемелік жаңашыл тәсілдері де сынға түсуде. Жуырда Семей теміржолының 533,6 шақырымында орын тепкен, үш бағытта қызмет көрсететін екінші класты Локоть станциясында тәжірибелік көрсетілім жүзіндегі техникалық дәріс өткізілді. Бұл техникалық оқу-жаттығу шаралары өткен мамыр айының 5-і күні жарияланған «Техникалық дәрістер және тәжірибелік дағды деңгейін көтеру» атты үшайлық аясында ұйымдастырылды. Сонымен қатар, қазіргі таңда өткізіліп жатқан пойыз және маневрлік жұмыстар өндірісі мен маршруттарды даярлаудағы баса назар аударылуы тиіс маңызды мәселелерді қамтитын айлықпен де орайластырылды. Яғни, осынау дәріс барысында негізінен пойыз қозғалысына жауапты мамандар машығын шыңдады.
Техникалық сабақта СЦБ жұмысы бұзылған жағдайдағы ДСП іс-әрекеті тақырыбы кеңінен қозғалды. Аталмыш дәріс кезінде станция қызметкерлері пульт-табло көмегі арқылы стандартты емес жағдай туындаған шақтағы өз әрекеттерін көрсетіп берді. Сонымен қатар байланыс саласына жауапты мамандармен бірге рельс бойына шығып, өз міндеттерін нақты іс жүзінде түсіндірді.
Аталмыш шара бөлімше басшысының бірінші орынбасары, қозғалыс саласының тәжірибелі маманы Қуаныш Әміреновтің тікелей жүргізуімен ұйымдастырылды. Сондықтан болар, жүк айналымы аса жоғары Локоть станциясының қызметкерлері біліктілік бойынша емтихан тапсырды десе де болғандай.
Тоқтала кетер болсақ, Ресей жерінде орналасқанымен Қазақстанның теміржол станциясы саналатын Локоть станциясында биылғы жылы қозғалыс жиілігі біршама артқан. Оған негізінен Ресей мен Қытай арасындағы жүк тасымалының жоғарылауы да себеп болған. Сондықтан станция қызметкерлері үшін жауапкершілік те біршама еселене түсуде. Ал осынау техникалық дәріс барысында өздері үшін тың жаңалықтар ашқан қозғалыс саласының мамандары үйренген, көңілге тоқыған әдіс-тәсілдерді қызмет барысында мүдірмей қолдана алатындықтарына сенімді.