Жел өтінде жүрген теміржолшылар үшін паналау орындары бой көтеруде

Қыстың қытымыр аязы мен жаздың шіліңгір ыстығында күн-түн демей далада жел өтінде жүретін теміржолшылардың еңбегі оңай емес. Жол бойынан жауында да, қарда да, аспан айналып жерге түскендей ыстықта да ашық далада жүретін кәсіп иелеріне пана болатын үйшіктер бой түзеуде.

Жолшылар, пойыз құрастырушылар, байланысшылар мен электриктер сынды ауа-райымен санаспайтын мамандық иелеріне жұмыс учаскелерінде әлеуметтік-тұрмыстық жағдай жасау ҚТЖ үшін басты басымдықтың бірі болып отыр. Бұл бағытта соңғы жылдары айтарлықтай бетбұрыс жасалуда.   Айталық, өңірлерге табиғаттың қолайсыз ауа райында пана болатын, жылыну пунктерін жасақтау қолға алынуда.  Шағын ғана үйшік бес тонналық контейнерлерден жасақталуда.   «Бүгінгі күні Атырау өңіріне сондай 95 контейнер жеткізіліп, Атырау және Құлсары  қалпына келтіру пойыздары мекемелерінде тұр. Атырау жол дистанциясына 50 дана, Құлсары жол дистанциясына 45 дана контейнер бөлінді. Олар өңірдегі барлық станциялар мен разъездерге орналастырылатын болады. Қазіргі уақытта орындары белгіленіп, бетоннан құйылған табан төсемі әзірленуде» дейді Атырау магистральдық желі бөлімшесі директорының міндетін атқарушы Амангелді Рахмеденов.  

Түзде жүретін теміржолшылардың жұмыс уақытында дамылдайтын орындарында қажеттінің бәрі бар. Онда жылынып, тамақ ішуге болады. Ішінде пеш, үстел мен орындықтар қойылған. Барлық станциялар мен разъездерде 1-ші қазанға дейін орналастыру көзделген.