«Теміржолсу» мекемесі қысқы маусымға дайындалып жатыр

«Теміржолсу» акционерлік қоғамының еншілес ұйымдары мен құрылымдық бөлімшелері қыс маусымына дайындық барысында жұмыстың сапалы әрі жоспарда белгіленген кестеге сай орындалуын басты назарға алып отыр.

«Теміржолсу» АҚ-ның ел өңірлерінде 12 филиалы бар. Олар 267 теміржол пунктінде орналасқан республиканың теміржол станциялары мен разъездеріне сумен және жылумен жабдықтау қызметтерін көрсетіп келеді. Бұған қосымша Қоғам Магистральдық желі дирекциясының 395 станциясы мен разъезін су және жылумен жабдықтап, сондай-ақ су бұру объектілеріне техникалық қызмет көрсетіп келеді. Қазір біз сумен және жылумен жабдықтау нысандарын 2023-2024 жылдардың қыс маусымында қалтқысыз жұмыс істеуі үшін дайындық жұмыстарын бастап кеттік. Біраз шаруа тындырылды. Атап айтқанда, қазандықтар мен жылу жүйелері жуылып, гидравликалық сынақтан өтсе, нысандардың ішкі жылу жүйелерінің әзірлігіне қатысты тұтынушылармен жұмыс жүргізілген. Сонымен қатар барлық қазандық шаруашылықтарындағы жабдықтардың тозу деңгейін анықтадық. Бірқатарына жөндеу жұмыстарын жүргіздік. Жылу магистралінің жылу оқшаулағыштары неғұрлым жетілдірілген оқшаулағыш материалдармен ауыстырылды. Бұл өз кезегінде тұтынушыларға жылу трассалары арқылы жылуды тасымалдау кезінде жылу шығындарын азайтады», – дейді Қоғамның бас инженері Ғазиз Жайылғанов.

«Теміржолсу» АҚ-ның маңызды міндеттерінің біріне Ұлттық компанияның құрылымдық бөлімшелерін қатты отынмен, яғни техникалық және тұрмыстық көмірмен қамтамасыз ету кіреді. Биыл техникалық және тұрмыстық қажеттіліктерге жеткізілетін көмір көлемі 89 838 тоннаны құрап отыр. Отандық көмір Шұбаркөл көмір кеніштерінен тиеліп тасымалдануда. Қазіргі уақытта теміржолшылар үшін 7245 тонна көмір жеткізілген. Ал техникалық қажеттіліктерге 66990 тонна қатты отын жеткізу жоспарланса, бүгінгі күнге нақты жеткізілім 13662 тонна құрап отыр. Жалпы көмір жеткізілімі жылыту маусымының соңына дейін берілген өтінімдер бойынша жүзеге асырылмақ.  

Қоғам қосымша кіріс тарту шеңберінде Магистральдық желі дирекциясы мен «ҚТЖ-Жүк тасымалы» ЖШС-на қарасты темір жол кәсіпорындарының ғимараттары мен құрылыстарына жөндеу жұмыстарын жүргізуде. Мәселен, ағымдағы жылдың алғашқы алты айында «Достық» станциясының 2 шағын ауданындағы 2742 шақырымдық орамішілік инженерлік желілер толық ауыстырып, 121 нысанға, соның ішінде Достық станциясы бойынша дирекцияның 10 нысанына, ЦЖС бойынша 100 нысанға және «ҚТЖ-Жүк тасымалы» ЖШС бойынша 11 нысанға ағымдағы жөндеу жұмыстарын жүргізген. Сонымен, «ҚТЖ-Жүк тасымалы» ЖШС бойынша локомотив бригадаларының қызметкерлері жайлы демалып тынығулары үшін 24 нысанға, яғни демалыс үйлері мен ғимараттарға ағымдық жөндеу жүргізілуде екен. Сонымен қатар ғимараттарға ағымдық және күрделі жөндеу жүргізу қызметтерімен қамтамасыз ету үшін «Теміржолсу» АҚ-да ТЖС аймақтық филиалдарын дамыту бағдарламасы әзірленбек.  

Қазіргі таңда Қоғамның барлық қызметкерлері қысқы және жазғы арнайы киім және аяқ киіммен қамтамасыз етіліп, оларға қауіпсіз еңбек жағдайы жасалыпты. Биыл 80-нен астам алғашқы қыстаушыларды қыс маусымында қауіпсіз жұмыс істеуге дайындау жоспарланып отырған көрінеді. Соның бүгінде 15-і дайындықтан өткен.