Астанада машинист-нұсқаушыларға арналған оқыту модулі өтті
«Қазақстан теміржолшысы» газетінің тілшісі
Астана қаласындағы «ҚТЖ» ҰК» АҚ қызметкерлерін оқыту және дамыту орталығында машинист-нұсқаушыларға арналған «Кәсіби шамшырақ» Корпоративтік даму бағдарламасы бойынша оқыту модулі өтті.
Іс-шараның ашылуына «ҚТЖ» ҰК» АҚ Қозғалыс қауіпсіздігі департаментінің директоры Марат Шакенов, «ҚТЖ» ҰК» АҚ Адами ресурстарды басқару департаментінің директоры Сәуле Истлеева және «ҚТЖ-Жүк тасымалы» ЖШС Бас директорының міндетін атқарушы Марлен Көкірекбаев, т.б. жауапты мамандар қатысты.
Ұйымдастырушылардың айтуынша, оқытудың негізгі мақсаты – машинистнұсқаушылар қызметінің тиімділігін арттыру, өндірістік қауіпсіздік деңгейін көтеру, өндірісте жарақат алуды азайту, кәсіби біліктілікті дамыту, жеке және командамен жұмыс сапасын жақсарту, жұмысшыларды оқытудың заманауи әдістерін енгізу. Бағдарлама кәсіби және көшбасшылық құзыреттерді дамытуға, «адам факторының» өндірістік процестерге теріс әсерін төмендетуге ықпал ететін білім мен дағдыларды игеруге, машинист-нұсқаушылар институтының жаңа мәртебесін қалыптастыруға, басқарудың озық құралдарын енгізуге бағытталған.
– Бірінші кезекте қандай жағдай болмасын біздің міндетіміз – қауіпсіздікті қамтамасыз ету. Осы бағытта локомотив бригадаларының білімін жетілдіріп отыратын машинист-нұсқаушыларға заманауи білім берудің, біліктілігін жетілдірудің маңызы зор. Бұл – уақыт талабы. Осында үйренген, алған білімді жергілікті жердегі әріптестерге таратып, ел теміржолының дамуына үлес қосасыздар деген сенімдемін. Машинист-нұсқаушы – ол ревизор және контролер емес, ол басшы, тәлімгер және ұстаз, – деді шараның ашылу салтанатында сөз алған «ҚТЖ» ҰК» АҚ Қозғалыс қауіпсіздігі департаментінің директоры Марат Шакенов.
Еліміздің түкпір-түкпірінен жиналған локомотив бригадаларының машинист-нұсқаушылары төрт күн бойы аталған бағдарлама аясында білім алды. Атап айтқанда, олар апатты және стандартты емес жағдайда қолданатын әдістер мен жаңа машықтарды меңгерді. Локомотив бригадаларына арнап техникалық сабақтар өткізетіндіктен оларға осы модуль барысында оқыту процесі құрылымы мен әдістемесін игеруге мүмкіндік берілді. Бірінші күні қатысушылар түрлі климаттық жағдайдағы апатты және стандартты емес оқиғалар кезінде әрекет ету, бақылау-инструкторлық сапар: машинист-нұсқаушының мақсаты мен міндеттері тақырыптарында саланың білікті мамандарының дәрісін тыңдады. Екінші күні өндірістік экскурсияға шығып, электр/жылу тартымының жаңа сериядағы локомотивтерінің құрастырылуы туралы дәріс тыңдады. Сонымен қатар арнайы мамандардан мінез-құлық пен әдеп кодексі, сыбайлас жемқорлықпен күрес мәселесі туралы мәліметтерге қанықты. Келесі күндері автотежегіштерді басқару, шешендік өнер, еңбек қауіпсіздігі мәдениеті тақырыптарында тренерлердің дәрісіне қатысты.
– Оқыту модулі барысында жаңа бағытта жұмыс істеу тәсілдерімен танысып, қарамағыңдағы қызметкерлермен қалай тиімді жұмыс істеуді үйрендім. Сонымен қатар өзге өңірлерден келген әріптестерімен кездесіп, танысып, өзара пікір алмастық, соның өзі тәжірибе, – дейді Екібастұз локомотив пайдалану депосының машинист-нұсқаушысы Нұржан Байбакин.
Машинист-нұсқаушыларды аталған бағдарлама бойынша оқытудың 1-ші модулі 15-18 тамыз аралығында офлайн өткізілсе, 2-ші модулі 24-31 тамызда онлайн және 3-ші модулі 25-27 қыркүйекте қайтадан офлайн форматта ұйымдастырылады. Екінші модуль цифрландыру, корпоративтік мәдениетті арттыру, еңбек заңнамасы, күйзеліске төзімділік, ESG, үнемді өндіріс бойынша мәселелерге арналады. Ал үшінші, соңғы модульде қатысушыларға тәжірибелік кейс талдау ұсынылады, сонымен қатар олар жобаларын қорғап, қорытынды шығарады және барлығы сертификаттарға ие болады. Үш модульдік оқу екі айда өткізіліп, соның барысында 50 машинист-нұсқаушы қамтылады.