Практикалық сабаққа қатысты

Қозғалыс қауіпсіздігін сақтауда қауіпті жүктердің қоршаған ортаға зиян келтіруінің алдын алудың маңызы зор. Соған сәйкес қараша айында еліміздің барлық аумағында «Қауіпті жүктерді тасымалдауға арналған жылжымалы құрамды техникалық бақылау» атты айлық жүріп жатыр.

Атырау вагон пайдалану депосында осы тақырыпта станция мамандарымен бірлескен практикалық сабақ өтті. Оған Атырау, Ақжайық, Махамбет, Теңдік, Қарабатан станцияларындағы өндірістік-техникалық қызмет көрсету (ӨТҚК) пункттерінің басшылары, нұсқаушы, техникалық оқыту шеберлері, слесарь-жөндеуші, аға вагон қараушылар, инженер-технологтары, барлығы 20-ға тарта адам қатысты. Әрине салмақ та, жауапкершілік те алдымен вагон қараушыларға түседі.  

Теориялық сабақ барысында жылжымалы құрамның қауіпті заттарды тасымалдауын пайдалану бойынша нұсқаулықтар, пойызды жүріп бара жатқанда басқару, станцияларда вагондарды толықтай тексеріп шығу, стандартты емес жағдайларда вагоншылардың әрекеті қандай болуы керек деген сынды мәселелер айтылып, түсіндірілді.  

Ал практикалық сабақ барысында депоның бас инженері Рашид Мұсабаев вагон-цистерна макеті жанында одан сұйықтық аққан кезде қалай әрекет ету керектігін көрнекті түрде көрсетіп, түсіндірді. «Вагон-цистернадан сұйықтық аққан жағдайда жоғарғы қақпақты ашып, штангаға ұшқын шығармайтын бұранда-ашқыш салып бұрап ағуды тыйып тастау керек. Содан соң тыйылғанына әбден көз жеткізген соң әрі қарай станцияға жіберуге болады. Осы жұмысты вагон қараушылар станция жұмысшыларымен бірлесе жасады, болғаннан соң жүк рейкамен өлшеніп, пломба салынып, акт форма ГУ-23 жасалады» дейді ол сабаққа қатысушыларға түсіндіру сәтінде.  

Практикалық сабақ барысында вагон қараушылардың өздері де макетті пайдаланып бұранданы бекітуді қайталап жасап көрді. Бас инженер Р.Мұсабаевтың айтуынша, осындай бірлескен техникалық оқу үнемі өткізіліп отырады және ол өте керек нәрсе. Өйткені мұндай практикалық сабақ ақауды тезірек тауып, бірлесе әрекет етуге жұмылдырады.