Техникалық кітапханаға – 90 жыл

Бүгінгі Семей теміржолындағы бірегей мәдени-рухани орталық саналатын техникалық кітапхананың құрылғанына биыл 90 жыл толып отыр. Жуырда бөлімше басшылығы, ҒТА және талдау орталығы мен салалық кәсіподақ ұйымының бірлесіп ұйымдастыруымен айтулы дата аталып өтті.

Салтанатты іс-шараға кітапханада ұзақ жылдар бойы еңбек еткен ардагер кітапханашылар, тұрақты оқырмандар мен ардагер теміржолшылар, жалпы тілеулес қауым жиналды.  

Семей магистральдық желі бөлімшесі бастығының орынбасары Дәурен Батталов пен «Қазкөліккәсіп» ҚБ Семей өңірі бойынша өкілі Есен Қажығұлов сөз сөйлеп, ғасырға жақын теміржолшылардың рухани қажеттілігін өтеп келген кітапхананың рөлі мен маңызын сөз етті. Құрметті теміржолшы, «Түрксіб-Семей» мұражайының құрметті директоры Мақсұт Көшжанов, теміржолшы әйелдердің «Бағыт» қоғамдық бірлестігінің төрайымы Нағима Мойынбаева, НЖС-6 бөлімшесінің аға мұрағатшысы Қымбат Оразалина да ізгі тілектерімен бөлісті. Бұл іргелі мекеме теміржол саласындағы кәсіби білім мен мәдениеттің алтын көпірі десті бірауыздан. Ал кітапханада кеңес дәуірі мен одан кейінгі аумалы-төкпелі кезеңде қызмет еткен Тамара Махнева, Күлбара Жүнісовалардың өткен күндерден сыр шерткен естеліктері көпшіліктің көңілін толқытты.  

Бүгінде ҒТА және талдау орталығының бастығы Баршагүл Омарова, бас кітапханашы Гүлмира Аралбаева, жетекші кітапханашы Айнұр Шарипова көптеген қоғамдық іс-шараларға ұйытқы болып жүр. Техникалық кітапхананың заманға сай жаңғырып, дамуын көрсететін бейнебаян көрсетілді.  

Сандық технология дамыған бүгінгі таңда да кітапхананың тұрақты оқырмандары өте көп. Әсіресе жаңа кітаптар мен газет-журналдарды жібермей оқитындар арасында басшылардың қатары молдығы қуантады. Жиында үздік оқырмандарға Алғыс хаттар табыс етілді. Олардың арасында аймақтық бас ревизор Темірбек Ақшалов, еңбекті қорғау саласының маманы Жомарт Шапишев, спорт нұсқаушысы Наталья Мешкова бастаған кітапсүйер теміржолшылар бар.  

Сонымен қатар кітапханашылардың өз оқырмандары мен кеш қонақтарына жасаған ерекше тартуына куә болдық. Олар Түрксіб теміржолынан қалған тәбәрік сынды көне кітаптардан арнайы көрме ұйымдастырыпты. Бір ғажабы, өткен ғасырдың 30-шы жылдары жарық көрген салалық туындылар әлі күнге дейін маңызын жоймаған.