Теміржолшы кәсібіне құрмет
Ақтөбе облысы бойынша меншікті тілші
Жұмысшы мамандықтар жылы аясында Ақтөбе облысының тарихи-өлкетану мұражайында теміржолшы есімі ұлықталды. Онда белгілі теміржолшы Таңсықбай Қазымбетовтің өмірі мен қызметіне арналған мұражайлық экспозиция ашылды.
Саналы ғұмырын теміржол саласына арнаған қарапайым еңбек адамы Таңсықбай Қазымбетов 1933 жылы Ақтөбе өңірінің Мұғалжар ауданында туып өскен. Ембі қаласында ФЗО-да оқып, еңбек жолын паровозда от жағушы болып бастаған. Орынборда оқып келіп, пойыз жөндеу шебері, бас кондуктор, локомотив депосының жөндеу шебері, машинист көмекшісі, машинист қызметтерін атқарған.
Ерен еңбек ескерусіз қалмай, Таңсықбай Қазымбетов «Еңбек даңқы» орденімен және «Құрметті теміржолшы» белгісімен, басқа да медальдармен марапатталған.
– Бұл бұрыш – теміржолшының еңбегі мен қоғамдағы орнын бағалап, кейінгі ұрпаққа үлгі ету мақсатында жасалды. Мұражайға келушілер қарапайым еңбек адамының тарихта қалған атын, еңбек жолымен таныса алады, – деді мұражай қызметкерлері.
Теміржолда от жағушыдан бастап, ерекше табысқа жеткен тұлғаның еңбегі мен өмір жолы туралы мәліметтер экспозицияда толық көрсетілген. Еңбек адамының бейнесін, кеңестік дәуірдегі идеология мен жұмысшы маманға деген құрметті көру қиын емес.
Ақтөбе облыстық тарихи-өлкетану мұражайының тарихы тұтас ғасырды қамтиды. 1929 жылдан бастап жинақталған құжаттар мен жәдігерлер – өңір шежіресінің баға жетпес қазынасы.
Сол құнды мұражайда теміржолшыға арналған арнайы бұрыштың ашылуы – шойын жолдың қара нары атанған еңбек адамына деген шынайы құрметтің белгісі. Бұл бастама – теміржол саласының өңір дамуындағы орны мен оның батырларының еңбегін ұлықтаудың жарқын үлгісі.