Жылжымалы құрамды жөндеушілер арасында шеберлік байқауы өтті

«Қамқор Локомотив» ЖШС – Ақтөбе локомотив жөндеу базасында Батыс өңіріндегі теміржол саласының жылжымалы құрамды жөндеушілері арасында «Үздік слесарь-2023» номинациясы бойынша кәсіби шеберлік байқауы өтті.

Төрт өңірдегі филиалдардан келген жұмысшылар сайыс барысында практикалық білімдерін, іскерліктері мен дағдыларын, 2ТЭ10МК сериялы тепловоздарды жөндеу арқылы өздерінің шеберліктерін көрсетті.  

«Қамқор Локомотив филиалдары арасындағы бұл байқау 2019 жылдан бері «Қамқор Магистраль» кәсіподақ ұйымымен бірлесе отырып жыл сайын өтуі дәстүрге айналған. Осы жылдар аралығында Астана локомотив жөндеу депосының базасында «Үздік дефектоскопист», ал Атбасар электровоз жөндеу зауыты базасында «Үздік дәнекерлеуші» сайыстары өткізілді. Әрине, мұндай іс-шаралардың басты мақсаты – мамандардың өзара тәжірибе алмасуына ықпал ету, кәсіби шеберліктерін дамыту және темір жол саласы жұмысшыларының мәртебесін арттыру – деді «Қамқор Локомотив» ЖШС Тартымды жылжымалы құрамға сервистік қызмет көрсету жөніндегі директоры А.С.Әлиев байқаудың ашылу салтанатында.  

Байқауға қазылық еткен сараптама комиссиясының тәуелсіз өкілдері әрбір қатысушының орындаған жұмысының жылдамдығы мен сапасына, қауіпсіздік техникасы мен еңбекті қорғау қағидаларының сақталуына назар аударып, жұмыс орнының мәдениетін бағалады. Әрбір қатысушының теориялық білімдері мен практикалық тәжірибелерін таразылады. Оның қорытындысы бойынша үздіктер де анықталды. «Үздік слесарь-2023» номинациясы бойынша бас жүлде Ақтөбе локомотив жөндеу депосының электр машина цехының жылжымалы құрамын жөндеу жөніндегі слесарі Андрей Понамарчукке бұйырды. Ал бірінші орынды Сексеуіл локомотив жөндеу депосы электр машина цехының жылжымалы құрамды жөндеу жөніндегі слесарі Мұзафар Ертанасов қанжығасына байласа, 2-ші және 3-ші орындарды Шалқар сервис орталығы электр машина цехының жылжымалы құрамды жөндеу жөніндегі слесарі Ақылбек Баешев пен Мақат сервис орталығы электр машина цехының жылжымалы құрамды жөндеу жөніндегі слесарі Азамат Есенғалиев өзара бөлісті.  

Байқау жүлдегерлеріне «Қамқор Магистраль» кәсіподағы атынан ақшалай жүлде – сертификаттар мен дипломдар табыс етілді.