Астана станциясына бес мобильді пункт сатып алынды
«Қазақстан теміржолшысы» газетінің тілшісі
Астана станциясындағы жұмысшылардың еңбек және өндірістік тұрмыс жағдайын жақсарту үшін бес мобильді пункт сатып алынды. Пойыз құрастырушыларға арналған алғашқы мобильді үйшіктер сұрыптау паркіне орнатылды.
Мобильді ғимараттың орнатылуын «ҚТЖ-Жүк тасымалы» ЖШС бас инженері Марлен Көкірекбаев тексерді. Жыл соңына дейін осындай тағы 4 үйшік пайдалануға берілмек. Олар сонау 60-жылдары салынған стационарлық пункттердің орнын алмастырады. Заманауи модульдік ғимараттар пойыз құрастырушылардың жайлы жұмыс істеуі мен демалысы үшін қажетті құрал-жабдықтармен толық жабдықталған. Жылжымалы үйде жұмыс істеуге және тамақтануға арналған аумақтар белгіленген. Ғимараттың қабырғалары жылу сақтайтын материалдармен оқшауланған, қасбеті плиткамен қапталған, пластикалық терезелер орнатылған. Парктің дауыс зорайтқыш байланысы жүргізілген. Тұрмыстық техникалар: тоңазытқыш, қысқатолқынды пеш, кондиционер және қажетті жиһаздар бар. Бөлменің ауданы 14 шаршы метр. Үйлерді жинап алып тасымалдауға болады. Бұл арнайы рұқсатты немесе қандай да бір шарттарды орындауды қажет етпейді.
«Пойыздарды құрастырып, таратып түзде жүретін пойыз құрастырушылардың жұмысы күрделі әрі жауапты. Өйткені кез келген ауа-райында, тәуліктің кез келген уақытында жұмыс істейді, сондықтан олар үшін қолайлы жұмыс жағдайын жасау маңызды», – дейді станция бастығы Ерлан Рахымжанов.
Астана станциясында 60 пойыз құрастырушы бар. Олар 12 сағаттық ауысымда 9 маманнан жұмыс істейді. Күн сайын станцияда 30-ға дейін пойыз жасақталады, 160-қа дейін құрам қабылданап, жөнелтіледі және өткізіледі.
«Ақмола филиалында жұмысшылардың еңбек жағдайын жақсарту, жарақаттануды болдырмау, жеке қауіпсіздік ережелерін сақтау, арнайы киіммен және қауіпсіздік аяқ киімімен қамтамасыз ету, сондай-ақ жұмыс орындарының санитарлық-тұрмыстық жағдайын жақсарту бойынша шаралар атқарылуда. Бұл шаралардың барлығы теміржолшылардың еңбек жағдайын жақсартып қана қоймай, олардың қауіпсіздігін қамтамасыз етуге мүмкіндік береді», – дейді бөлімнің бас инженері Сайран Баржақсин.