«Мойынты – Шу» теміржолына – 70 жыл
Тарихқа – тағзым, өткенге құрмет көрсетуге арналған мерекелік іс-шара тоғыз жолдың торабы Шу станциясында аталып өтті. Қазақ теміржолының тынысын ашып, өңірдің әлеуметтік және экономикалық дамуына өлшеусіз үлес қосқан теміржол торабының айтулы датасы қоғам және мемлекет қайраткері Тұрар Рысқұловтың ескерткішіне гүл шоғын қоюдан басталды.
Еңселі ескерткіш алдына жиылған теміржолшылар мен сала ардагерлері бір минут үнсіздікпен Тұрардай қайраткердің жолын жалғап, «Мойынты – Шу» теміржолын салуға атсалысқан, дамытуға еңбек сіңірген азаматтарды да еске алып, рухына тағзым етті.
Әрі қарай аудандық Мәдениет үйінде жалғасын тапқан салтанатты шараға әрісі Астана мен берісі Алматыдан арнайы келген қонақтар қатарында танымал сала ардагерлері Қалтай Сәмбетов, Дәулетбай Есімбеков, ҚТЖ Ардагерлер кеңесінің төрағасы Болатбек Дүйсемәлиев, т.б. болды.
Салтанатты жиынды ашқан Шу ауданының әкімі Бақытжан Жәнібеков көпшілікті экономиканың күретамырына айналған теміржолдың мерейтойымен құттықтап, Трансқазақстан магистралінің құрылысын аяқтайтын Мойынты – Шу темір жол желісінің 70 жылдығы айтулы дата екенін атап өтті. Аудан басшысы атаулы мерейтойға орай бір топ азаматты «Шу ауданына сіңірген еңбегі үшін» белгісімен марапаттады. Сондай-ақ 20-ға жуық ардагер теміржолшыға «Мойынты – Шу» теміржол желісінің пайдалануға берілгеніне 70 жыл» мерейтойлық медалі тапсырылды.
Жиында сөз алған ардагерлер ел тарихының елеулі кезеңін қамтитын 70 жылда темір жолда еңбек еткен сала қызметкерлерінің еңбектері мен ел экономикасының дамуына қосқан үлестеріне айрықша тоқталды. Сала ардагерлері кеңесінің төрағасы Болатбек Дүйсемәлиев өз сөзінде ғасырлық кезеңге қадам басқан «Мойынты – Шу» учаскесінің бүгінгі таңда көлік-логистиканы дамытуда үлкен маңызға ие екеніне ерекше тоқталды.
Ұлы Отан соғысынан кейінгі жылдарда нағыз халықтық құрылысқа айналған «Мойынты – Шу» теміржол желісінің мерейтойы Шу ауданы ғана емес, ел тарихында елеулі дата екеніне өз сөзінде ардагер теміржолшы Дәулетбай Есімбеков те тоқталды. Ал Жұмабай Шаяхметовтің немересі Равиль Шаяхметов «Мойынты – Шу» телімінің тарихи маңызын тілге тиек етті.
Салтанатты шараға арнайы келген «ҚТЖ – Жүк тасымалы» ЖШС Адами ресурстарды басқару және әлеуметтік саясат департаментінің атқарушы директоры Әділжан Исмуханбетов те сөз алып, теміржолшылар мен сала ардагерлерін, жалпы Шу ауданы жұртшылығын өңірдің дамуына қызмет етіп келе жатқан болат магистральдың 70 жылдық мерейтойымен құттықтады. Жиын соңы Шу аудандық Мәдениет үйі өнерпаздарының концертіне ұласып, ән мен жырдан шашу шашылды.
Ардақ ҮСЕЙІНОВА,
Тараз – Шу
Суреттерді түсірген автор