Ардагерлердің өнегелі өмір жолы

Ақтөбедегі теміржолшылар мұражайында Ұлы Отан соғысына қатысқан теміржолшыларға арналған арнайы секция бар. Онда қан майданды көрген ардагер теміржолшылардың өнегелі өмір жолы жайлы дерек көп.

Батыс Қазақстан теміржолының тарихынан сыр шерткен Ақтөбе мұражайында 20-дан аса Ұлы Отан соғысы ардагерлерінің есімі хаттаулы. 1941-1945 жылдары майдан даласында болған теміржолшылардың суреті қазақтың батыр қызы Әлия Молдағұлова бейнеленген баннерге қойылған. Отан үшін шайқасқандар мен еңбек майданына қатысқан ардагерлер туралы ақпарат мұражайда альбом ретінде сақталған. 

Жаңбырбай Шақаев, Жанай Қарабалдин, Александр Британский, Күлпаш Тәженов, Шамша Сәлімбаев секілді Құрметті теміржолшылардың еңбегі жазылған альбом ескі болса да құнды. Әр беті бір теміржолшыға арналған. Көпшілігі соғыс кезінде жол дистанциясында еңбек еткендер. 

«Ендігі кезекте ерлерімізді ұлықтап, олардың туған еліне, жеріне деген сүйіспеншілігін, Отанын жанқиярлық сезіммен қорғауын дәріптеп, жастардың ұлттық сана-сезімін оятуға жағдай жасау міндеті тұр. Сондықтан мұражайымызда осындай орын дайындадық. Әр есім – тұлға, батыр. Қоғамның дамуы мен келешек ұрпаққа патриоттық тәрбие беру үшін олардың жанқияр еңбегін насихаттауымыз керек», – деді мұражай қызметкері Анар Жұбаева. 

Мұражайда өткен ғасырда отандық теміржол көлігінің тарихын жасаған тұлғалар туралы мәліметтер аз емес. Теміржолшылардың революцияға және азамат соғысына қатысуы, темір жолды қалпына келтіру, Ұлы Отан соғысы жылдарындағы, соғыстан кейінгі бесжылдықтар, еңбек ұжымдары туралы жүздеген құжат бар. Сонымен қатар соғыс кезінде қолданған теміржол бұйымдары, жолға қажет бөлшектер, станцияда қолданған заттар, ескі телефондар, т.т сақталған.