Атырау станциясына жаңа басшы тағайындалды

Жарты ғасырдан астам тарихы бар Атырау станциясына жаңа басшы тағайындалды. Станцияны көп жыл басқарған Алтай Көбегенов зейнетке шыққан соң бұл лауазым екі айдан аса уақыт бос тұрған еді.  

Жуырда комиссия шешімімен Бекжан Жиенбетов станция бастығы болып тағайындалды. 1988 жылы Атырау облысы Қызылқоға ауданы Сағыз станциясында дүниеге келген Бекжан Зайдоллаұлы еңбек жолын 2009 жылы Ақжайық станциясының пойыз қабылдаушысы болып бастаған. Әрі қарай сатылап өсіп қозғалыс саласының барлық баспалдақтарынан өткен: Махамбет станциясында пойыз құрастырушы, станция кезекшісі, кейін пойыз диспетчері, Атырау станциясының бас инженері лауазымдарын атқарды. Ол өз ісін жетік білетін жас мамандар қатарынан саналады. 2009 жылы М.Тынышпаев атындағы Қазақ көлік және коммуникациялар академиясын тасымалдауды ұйымдастыру мамандығы бойынша күндізгі бөлімде оқып бітірген. «Кәсібі бойынша үздік», «Кәсіподаққа 25 жыл» төсбелгілерімен марапатталып, 2019-2021 жылдары ҚТЖ-ның «100 жас есім» қатарына енді. Қазақстан темір жолының КТЖ.кz командасында өнер көрсетіп, түрлі мәдени-көпшілік, спорттық шаралардың бел ортасында жүрген белсенді жастардың бірі. 2014 жылы «Ең үздік жас диспетчер» атағына ие болды. Атырау станциясы – ҚТЖ бойынша ең ірі және маңызды  станцияның бірі. Бірінші класты учаскелік станцияда 6 жолдан тұратын сұрыптау паркі, ұзындығы 1250 метр болатын 10 жол, аз қуаттағы дөңес бар. Жүк және қозғалыс цехтары да жұмыс жасайды. Бүгінгі күні станцияда 110 маман еңбек етеді.  

Сонымен қатар өңірдегі Махамбет станциясына Мансұр Кеңесов, Сағыз станциясына Серік Сұлтанов станция бастығы болып тағайындалды. Олар да  салада біраз жылдан бері еңбек етіп, тәжірибе жинақтап үлгерген, болашағынан үміт күттіретін жастар қатарынан.