Теміржолшылар алаңы мүсіндер сериясымен толықты

Қазақстан темір жолының 120 жылдығына орай елорданың «Мәңгілік Ел» салтанат қақпасы жанындағы «Теміржолшылар алаңы» магистраль мамандықтарының құрметіне орнатылған мүсіндер сериясымен толықтырылды. Көлік қызметкерлері күні оның салтанатты ашылу рәсімі болып өтті.

«ҚТЖ» ҰК» АҚ басшылығы мен сала ардагерлері қатысқан шарада көпшілік назарына машинист, жолсерік, жолшы мамандықтарын сомдаған мүсіндер ұсынылды. Шағын архитектуралық пішіндердің авторы – белгілі мүсінші, Мемлекеттік сыйлықтың лауреаты Мұрат Мансұров. Мүсіндер теміржол магистралінің қуатты күшінің белгісі ретінде қоладан жасалған.  

Ардагерлер темір жолдың тыныс-тіршілігінде маңызды рөл атқаратын кәсіп иелерін бейнелеген мүсіндерге жоғары баға беріп, елордаға осындай 1 гектар алаңда 300-ге жуық жапырақты – үйеңкі, жөке, мойыл сынды түрлі ағаштар, 3000 астам бұталар мен гүлдер отырғызылған Теміржолшылар саябағын тарту еткен Ұлттық компанияға алғыс айтты. Бұдан кейін теміржолшы ардагерлер Орталық саябақта теплоходқа мініп, еркелей аққан Есіл өзені үстінде таза ауамен тыныстап, әсем қаланы су көлігі арқылы тамашалады.  

Түстен кейін ҚТЖ компаниясында еңбек көрігін қыздырып, теміржолдың ыстығы мен суығына бірдей жүрген магистраль майталмандарына арналған мерекелік кеш болды. Алдымен Қазақстан темір жолының 120 жылдығына арнайы жасалған бейнеролик көрсетіліп, «ҚТЖ» ҰК» АҚ Басқарма төрағасы Нұрлан Сауранбаев көпшілікті кәсіби мерекемен құттықтады.  

– Биылғы төл мерекеміз Қазақ даласына темір жолдың алғашқы буыны төселгеніне 120 жыл толуымен тұспа-тұс келіп отыр. Теміржолдың бүгінгі деңгейге жетуінде ата-бабаларымызбен бүгінгі салтанатты кешке қатысып отырған сала ардагерлерінің ерен еңбегі жатыр. Баршаңызға баға жетпес еңбектеріңіз үшін алғыс білдіремін. Бүгінде еңбек етіп жатқан теміржолшыларға да көп рахмет. Сіздердің еңбектеріңіздің арқасында Компания рекордтық жетістіктерге жетті. Теміржолшылардың еңбек жағдайы Компания басшылығы тарапынан үнемі басты назарда екенін атап өткім келеді. Жалақыны көтеріп, шағын механизация құралдарын алып жатырмыз, еңбек жағдайын жақсартуға қомақты қаражат бөлініп отыр, – деді Компания басшысы.  

Бұдан кейін сахна төріне «Құрметті теміржолшы» белгісін алған марапат иелері шақырылды. Олар Компания басшысы қолынан марапат алып, естелікке суретке түсті. Ресми бөлімнен кейін салтанатты кеш теміржол саласының талантты еңбеккерлері «Jan» театрының әртістерімен бірлесіп ұйымдастырылған мерекелік концертке ұласты.