Желілік деңгейде олимпиада өтті

Жуырда Магистральдық желі дирекциясының Еңбекті қорғау және қауіпсіздік, экология және өнеркәсіптік қауіпсіздік департаменті желілік деңгейде олимпиада өткізді. Еңбек қорғау жылы аясында өткен шара денсаулықты қорғау, еңбек қауіпсіздігі мен қоршаған ортаны қорғауды қамтамасыз ету бойынша онлайн форматта ұйымдастырылды.

Іс-шараның мақсаты – қызметкерлерді денсаулықты, еңбек қауіпсіздігі мен қоршаған ортаны қорғауға ынталандыру, кәсіби құзыреттілік пен шығармашылық әлеуеттің сапасын арттыру болатын. Сондай-ақ бұл шара қыркүйек айының соңғы жексенбісінде атап өтілетін Еңбек күні мерекесіне де орайластырылды.  

Желілік деңгейдегі олимпиадаға өңірлік деңгейде іріктелініп алынған Ақмола, Қостанай, Қарағанды, Семей, Алматы, Жамбыл, Шымкент, Қызылорда, Ақтөбе, Маңғыстау магистральдық желі бөлімшелері мен Илецк теміржол учаскелерінен барлығы 25 адам қатысып, оның ішінде салалық денсаулықты қорғау және еңбек қауіпсіздігі бойынша 18 адам, қоршаған ортаны қорғау бойынша 7 адам өзара бақ сынасты. Олардың жұмысын Дирекция басшылары мен кәсіподақ төрағасынан құралған қазылар алқасы бағалады.  

Олимпиада 3 турдан тұрды. Бірінші турда қатысушылар тестік тапсырмаларды орындады, екінші турда ситуациялық жағдайлардан шешім тауып, үшіншісінде блиц-сауалнамаға жауап берді. Қорытындысы бойынша жоғары ұпай жинаған қатысушылар жүлделі орындарға ие болды.  

Таратып айтсақ, Денсаулықты қорғау және еңбек қауіпсіздігін қамтамасыз ету бойынша Алматы магистральдық желі бөлімшесі филиалының еңбек қауіпсіздігі және еңбекті қорғау, өнеркәсіптік қауіпсіздік және экология секторының меңгерушісі Аханова Несіпкүл Әділбекқызы – 1-орынды, Алматы магистральдық желі бөлімшесі филиалы Ақтоғай темір жол дистанциясы еңбекті қорғау, өнеркәсіптік қауіпсіздік және экология қызметінің еңбекті қорғау және қауіпсіздік техникасы жөніндегі жетекші инженері Нұрмұхаметов Берік Қабылқаұлы – 2-орынды, Қостанай магистральдық желі бөлімшесінің еңбек қорғау және қауіпсіздік, өнеркәсіптік қауіпсіздік және экология секторының жетекші инженері Қабдуғалиева Ляззат Төлегенқызы 3-орынды иеленді.  

Қоршаған ортаны қорғау туры бойынша сайыста 1-орын мінберінен Маңғыстау магистральдық желі бөлімшесіне қарасты Маңғыстау электрмен жабдықтау дистанциясының еңбекті қорғау және қауіпсіздік, өнеркәсіптік қауіпсіздік және экология қызметінің жетекші инженері Ибрашева Жанар Дарменқызы көрінді. Екінші орын Алматы магистральдық желі бөлімшесінің еңбек қорғау және қауіпсіздік, өнеркәсіптік қауіпсіздік және экология қызметінің жетекші инженер-экологы Қосымбаева Зару Аманбайқызына бұйырды. Ал 3-орынды Жамбыл магистральдық желі бөлімшесінің еңбекті қорғау және қауіпсіздік, өнеркәсіптік қауіпсіздік және экология қызметінің жетекші инженері Есіркепов Жандос Қуатбекұлы иеленді.  

Жүлделі орын алған бұл жеңімпаздар «ҚТЖ» ҰК» АҚ және оның еншілес ұйымдарында еңбекті қорғау және қауіпсіздік, қоршаған ортаны қорғау бойынша өтетін корпоративтік олимпиадаға қатысып, бақ сынайтын болады.