Білім мен білік сынға түскен жарыс

«ҚТЖ» ҰК» АҚ-да Компания мен оның еншілес ұйымдары арасындағы еңбек қауіпсіздігі және еңбекті қорғау бойынша жыл сайынғы олимпиаданың кезекті жарысы өтті. Оған ел өңірлерінде өткен жарыстарда топ жарған 13 жеңімпаз қатысты.

Қауіпсіздік минутынан басталған олимпиаданы «ҚТЖ» ҰК» АҚ бас инженері Рамазан Садырқұлов құттықтау сөзімен ашып, білім мен біліктілік сынға түскен жарыста қатысушыларға сәттілік тіледі.  

Бас инженер төрағалық еткен әділ қазылар алқасы құрамында «Самұрық-Қазына» қорының еңбекті қорғау және қауіпсіздік секторының бастығы Е.Елекеев, Орталық кәсіподақтар кеңесінің еңбекті қорғау жөніндегі бас техникалық инспекторы Қ.Мұқанов, Өндірістік қауіпсіздік және экология департаментінің директоры Ә.Семенов, Адами ресурстарды басқару департаментінің HR-бизнес серіктесі А.Айсариева болды.  

Олимпиада үш турдан тұрды. Бірінші турда қатысушылар еңбек қауіпсіздігі және еңбекті қорғау саласындағы нормативтік құжаттарды білу білімін тексерген тестілеуден өтті. Қатысушыларға 20 сұраққа жауап беруге 30 минут берілді. Екінші тур ситуациялық жағдайлардан жол табу тапсырмасына ұласты. Бұл тапсырманы орындау кезінде қатысушылар командаларға бөлініп, бірлесе жұмыс істеді. Барлығы 4 тапсырма болып, әр тапсырманы орындауға 10 минуттан берілді. Тапсырмалар бейнеролик арқылы экранда көрсетілді. Осы екінші турдың нәтижелері сарапқа салынып жатқан тұста модератор Өндірістік қауіпсіздік және экология департаментінің қызметкері Алтынай Жатқанбаева қатысушыларға ой салар үндеу жолдады.  

«Негізі еңбек қауіпсіздігі және еңбекті қорғау – әрбір жұмыс процесінің ажырамас бөлігі болуы тиіс қағидалар. Өкінішке орай, техника қауіпсіздігін сақтамағаны үшін 2 жұмысшы қайтыс болып, бір жұмысшы бір көзінен айырылды. Сондықтан біз терең білімге ие болып, оны тәжірибеде қолдансақ, адамдардың өмірін сақтап қалу мүмкіндігіміз еселене түседі», – деді ол.  

Үшінші тур блиц-сауалнамадан тұрды. Оның шарты бойынша әр қатысушыға бір сұрақтан қойылып, жауап беруге 3 секунд берілді, егер қатысушы дұрыс жауап берсе, 1 балдан беріліп, ал екі қатысушы дұрыс жауап бермесе, балл сұрақ қойған адамға есептелді.  

Осылайша, екі сағатқа созылған олимпиада мәресіне жетті. Жеңімпаздарды анықтау алдында Өндірістік қауіпсіздік және экология департаментінің директоры Ә.Семенов сөз алып, олимпиада қатысушыларға өз білімдерімен бөлісуге, командалық рухты сезінуге мұрсат бергенін атап өтті. Сондай-ақ ол еңбек қорғау мамандарына жауапты қызметте өздерін жетілдіріп, дамыта беруге кеңес етті.  

Сонымен олимпиада турларының қорытындысы бойынша 1-турда Қостанай НЖС-нің жетекші инженері Ләззат Қабдуғалиева, 2-турда Ақтоғай жол дистанциясының жетекші инженері Берік Нұрмұхаметов, 3-турда «Оңтүстік» аймақтық филиалының сектор бастығы Айдын Зиеденов «Көшбасшылық» номинациясы бойынша топ жарды. «Шешендік өнер» аталымында «ӘТЖК» АҚ Алматы филиалының маманы Болат Мыңбаев, «Олимпиаданың ең белсенді қатысушысы» номинациясында «KTZ Express» АҚ – «KTZE Батыс» филиалының бас маманы Әсет Ақназаров, «Ең жылдам жауап қайтарғаны үшін» аталымында Арыс вагон пайдалану депосының сектор бастығы Әмір Жұмағали, «Денсаулықты қорғау және еңбекті қорғау саласында ең креативті маман» номинациясында «КДТС» АҚ Павлодар филиалының инженері Әлия Оспанова, «Жеңіске деген ерік-жігері үшін» аталымында «ҚТЖ-Жүк тасымалы» ЖШС Жаңаесіл локомотив пайдалану депосының сектор бастығы Карина Мұхтарова, «Биіктікті алуға тырысқаны үшін» номинациясында «Қазтеміртранс» АҚ Қызылорда филиалының 1-санатты инженер технологы Бауыржан Нұғманов және «Олимпиаданың ең жас қатысушысы» аталымы бойынша Алматы НЖС сектор бастығы Несіпкүл Аханова жеңімпаз деп танылып, барлығына «ҚТЖ» ҰК» АҚ Басқарма төрағасының «Құрмет» грамотасы табысталды және 8 АЕК мөлшерінде ақшалай сыйақы берілетін болды.  

Ал Денсаулық және қауіпсіздік бойынша корпоративтік олимпиадада 3-орын алған Ақтау портының еңбек қорғау және өндірістік қауіпсіздік қызметінің 1-санатты маманы Жанар Қуанышева «Үздік маман», 2-орын алған Құрық портының бөлім бастығы Аңсар Сансызбай «Адал еңбегі үшін» төсбелгісімен, ал 1-орынды қанжығасына байлаған Алматы ЖТ бөлімшесі – Алтынкөл айналым депосының 1-санаттағы инженер-технологы Гүлзат Байниязова «Үздік маманмен» қатар «Адал еңбегі үшін» төсбелгілерінің иегері атанды. Олимпиада жеңімпазына санаторийге демалуға тегін жолдама берді. Сондай-ақ олимпиадада топ жарған үш орын иегеріне де 40 АЕК мөлшерінде сыйақы берілетін болды.