Бірегей жобалар таныстырылды
«Қазақстан теміржолшысы» газетінің тілшісі
ХІІІ республикалық жастар форумы «ҚТЖ-ның 100 жас есімі» бағдарламасының екінші ағынының дарынды жастары компанияның болашағы үшін қажет деп танылған үздік жобаларды таныстырды. Осы қатысушылар арасында екі маңызды жоба ұсынып және олар аудитория тарапынан жылы қабылданған «ҚТЖ Тапқырлары» командасы ерекше көзге түсті.
«Біздің командаға түрлі бағыттағы өз саласының білгір мамандары жиналған және негізгі жүктемеге қарамастан біз ҚТЖ жұмысының маңызды аспектілерін қозғайтын екі жобаны ұсындық. Бұл бастамалар қазіргі кемшіліктерді жоюға ғана емес, сонымен қатар компанияның дамуына негіз қалауға арналған. Біздің жобаларымыздың бірі «Теміржол вокзалдарының дизайн-коды» – ҚТЖ жастарының ұсынған 18 бастамасы арасында үздік деп танылды», – дейді команда капитаны Саят Мақсұт.
«Теміржол вокзалдарының дизайн-коды» жобасының мақсаты – вокзалдардың тарихи бірегейлігін ескере отырып, оларды безендірудің негізгі элементтерін стандарттау болып табылады. Бұл идея көлік инфрақұрылымына қойылатын заманауи талаптарға сәйкес келетін жолаушылар үшін жайлы, функционалды және танылатын ортаны құруға бағытталған.
Сонымен қатар команда жаңа қызметкерлерді бейімдеу үшін виртуалды көмекші Welcome-bot KTZ жобасын ұсынды.
«Осы құралдың көмегімен, – деп түсіндіреді Саят, – әрбір жаңа қызметкер Компанияның корпоративтік мәдениетіне оңай еніп, оның миссиясы мен құндылықтары туралы біле алады, сонымен қатар қадамдық нұсқаулар мен бейнеоқулықтар ала алады. Сондай-ақ платформада техникалық мәселелерді жедел шешуге арналған Help-desk бар. Бұл жаңа қызметкерлердің өнімділігін арттыруға, талантты кадрлардың кетуін азайтуға, сондай-ақ корпоративішілік өмірге жаңа қызметкерлердің тартылуын арттыруға мүмкіндік береді».
Бір қызығы, Welcome-Bot KTZ компанияның еншілес құрылымы «Әскерилендірілген теміржол күзеті» компаниясында пилоттық режимде сәтті сынақтан өтті. Ал ҚТЖ-да іске қосылуы 2025 жылдың қаңтарына жоспарланған.
«ҚТЖ-ның 100 жас есімі» бағдарламасы қызметкерлерді ағымдағы процестерді оңтайландырып қана қоймай, ұлттық тасымалдаушының болашағын қалыптастыра алатын креативті шешімдерді іздеуге шабыттандыруды жалғастыруда. «ҚТЖ тапқырлары» сияқты талантты командалардың жобалары ҚТЖ өз жастарының инновациялары мен кәсібилігіне бәс тігетінінің жарқын дәлелі болып табылады.
Локомотив шаруашылығы үшін келесі бір маңызды жоба «Цифрлық депо» деп аталады. Бұл жобаның мақсаты локомотивтердің техникалық жағдайы мен пайдалануына мониторинг және талдау жасау үшін цифрлық платформа құру болып табылады. Жоба жүзеге асырылғанда күтілетін нәтижеге келсек, біріншіден, локомотивті пайдалану тиімділігін арттырмақ, екіншіден, локомотивтердің кідірісін және жоспардан тыс жөндеуге кіруін 30% төмендетпек. Сондай-ақ 120 бірлік локомотивтің жоспардан тыс жөндеуіне кететін шығынын 180 млн теңгеге дейін үнемдеуге әкеледі деп болжануда.
Магистральдық желі дирекциясының Адами ресурстарды басқару департаментінің бас менеджері Қырмызы Махамеджанова жетекшілік еткен келесі бір жоба «HRКөмек» чат-боты. Оның мақсаты – санаторлық-курорттық сауықтырудан бастап, 24/7 әлеуметтік мәселелер бойынша өзекті ақпараттарға қолжетімділікті қамтамасыз ететін қызметкерлер үшін коммуникацияның қосымша каналын құру. Бұл жоба 2025 жылдан бастап өзге әлеуметтік мәселелер бойынша деректердің ұсынылуын кеңейтуді жоспарлап отыр. Ал «HR-Көмек» чат-ботынан қандай нәтиже күтуге болады десек, бұл жоба қызметкердің ақпаратқа жедел қолжетімді болуы есебінен игерілмей қалатын жолдамалар санын төмендетпек, екіншіден, Компания еңбеккерлерінің қатысуы мен ниеттестігін арттыра түспек. Үшіншіден, HR қызметінің жұмыс уақытын оңтайландырып, анықтамалық ақпаратты ұсыну үдерісін автоматтандырылмақ.
Бұл теміржол саласындағы талантты жастар ұсынған тың жобалардың бір легі. Әрине, әр жобаның ҚТЖ-ның дамуына қосар өзіндік үлесі, алар ерекше орны бар. Темір жолда өз кәсібін, мамандығын сүйетін және оны жетілдіру жолында тынбай еңбек ететін жастар барда ҚТЖ-ның болашағы жарқын болары сөзсіз.