Тиімді коммуникация құра білейік...
«Қазақстан теміржолшысы» газетінің тілшісі
Форум аясында өткен тренингтердің бірі «Экологиялық коммуникациялар» деп аталды.
– Бұл тренингтің мақсаты – коммуникацияларды жақсарту. Тренинг 80 пайыз практикадан тұрады. Көп бөлігі бизнес ойын, талқылау болса, қалғаны – теория. Осылар арқылы әр адамның мықты жақтарын көрсетіп, айқындау көзделуде. Мұның бәрі әуелі тыңдау, сосын кедергілерді жою және кері байланыс арқылы жүзеге асырылады, – дейді коммуникация жөніндегі бизнес тренер Айбатыр Төрешов.
Тренингке қатысқан 60 шақты жас бірнеше топқа бөлініп, жаттықтырушы берген шарттарға сай 4 сағат бойы тапсырмаларды орындады. Олар тиімді коммуникация құру үшін не істеу керектігін үйренді.
– Форумға қатысу үшін мен «ҚТЖ100 жас есім» жобасына кірдім. 4 күндік форум жоғары деңгейде ұйымдастырылғаны және өте қызықты болғаны сондай, уақыттың қалай өткенін білмей қалдық. Неше түрлі тренингтерге қатыстық. Бұл тренингтер адамның ой-санасын өзгертеді, алға қарай ұмтылдырады, теміржолшы болғаныңа мақтан тұтуды үйретеді. Форум барысында жан-жақтағы әріптестермен танысып, достығымыз артты. Сонымен қатар жоғары басшылармен кездесіп, олар өздерінің жұмыс тәжірибесімен бөлісті. Оларды тыңдағаннан сабақ алдық. Форум жұмысы тығыз кестеге құрылғанымен мүлдем шаршамадық, – дейді тренингке қатысушы, Шымкент жүк тасымалы бөлімшесі кадр бөлімінің маманы Жұлдызай Қайсарова.