Астанада «Жұмысшы мамандықтары қаласы» фестивалі басталды

Бүгін Астанадағы «EXPO» халықаралық көрме орталығында «Жұмысшы мамандықтар қаласы» республикалық фестивалі басталады. Бес күнге созылатын фестиваль болашақ мамандардың, жұмыс берушілер, техникалық және кәсіптік білім беру ұйымдарының өзара әрекеттесу алаңына айналады деп күтілуде.

Мемлекет басшысының Жарлығымен 2025 жыл – «Жұмысшы мамандықтары жылы» деп жарияланды. Осыған орай, жұмысшы кәсіптерінің беделін арттыру, сондай-ақ техникалық және кәсіптік білім беруді реформалау мақсатында Үкімет Жұмысшы мамандықтары жылына арналған республикалық жоспарды бекітіп, ал Оқу-ағарту министрлігі 2025-2027 жылдарға арналған Техникалық және кәсіптік білім беруді трансформациялаудың Жол картасын қабылдады. Айта кетерлігі, еліміздің барлық өңірлерінде «Жұмысшы мамандықтары жылын» өткізу жоспары әзірленіп, онда жұмысшы кәсіптердің беделін арттыру, кадрлар даярлаудың сапасын жақсарту, жұмыс берушілермен өзара іс-қимылды кеңейту шаралары қарастырылған.  

«Жұмысшы мамандықтары қаласы» республикалық фестивалі – Оқу-ағарту министрлігі тарапынан ұйымдастырылып отырған үлкен шара. Фестиваль қонақтары тақырыптық көшелерді: атап айтқанда, тау-кен ісі және металлургия, машина жасаушылар және көлікшілер, аграршылар және су саласы, құрылысшылар, болашақ мамандықтар, құтқарушылар мен өрт сөндірушілер бұрышын аралау мүмкіндігіне ие болады.  

Мұнда түрлі семинарлар, мұнай және энергетика салаларындағы тақырыптар бойынша хакатон, кәсіптер шеруі, бос жұмыс орындары жәрмеңкесі, стартап презентациялары, машина жасау бойынша шеберлік сабақтары, концерттер, халықаралық аккредиттелген колледждер үшін тренингтер өтеді.  

«Жұмысшы мамандықтары қаласы» фестивалі аясындағы негізгі іс-шаралардың бірі күн сайын сағат 16:00-ден 17:30-ға дейін өтетін «Бос орындар жәрмеңкесі» болмақ. Оған «ҚТЖ» ҰК» АҚ да қатысады. Компания өкілдері job.railways. kz рекрутингтік платформаның жұмысы бойынша консультациялар өткізіп, жұмыс іздеген үміткерлерге компания тобының барлық бос жұмыс орындары жарияланған осы сайттан қажетті мамандықтарды қалай табуға болатынын егжей-тегжейлі түсіндіріп береді.  

«Бүгінгі таңда ҚТЖ компаниялар тобында бүкіл Қазақстан бойынша 631 бос жұмыс орны жарияланды. Жұмыс іздеп жүрген немесе елдің жетекші көлік компаниясында мансап құрғысы келетіндердің бәрін шақырамыз! Бос орындар жәрмеңкесі – бұл ағымдағы жұмыс орындары туралы білуге, жұмыс берушіге сұрақтар қоюға, сенімді және перспективалы салада жұмыс табуға тамаша мүмкіндік», – дейді «ҚТЖ» ҰК» АҚ Адами ресурстарды басқару департаментінің өкілі Айдана Жайжумова.