Электровоз паркі жаңарады
«Қазақстан теміржолшысы» газетінің тілшісі
Көлік министрлігінде Aльстом компаниясы өкілдерінің қатысуымен локомотив паркін жаңарту тақырыбын қамтыған кездесу өтті. Онда теміржол техникасын шығаруда әлемдегі үздік компанияға жататын Aльстом жаңа буындағы алты осьті жүк электровоздарын өндіру аясындағы ұсынысы туралы баяндады.
Альстом – ТМД және Еуропа елдері үшін сенімді серіктес, жоғары сапалы локомотив жабдықтарын өндіріп шығаруда айтарлықтай тәжірибеге ие. Қазақстанда 2010 жылдан бастап жұмыс істей бастаған компанияның алты қалада 10 өнеркәсіптік учаскесі бар, онда 1200 адам жұмыс істейді. Альстом ұзақмерзімді келісімшарт негізінде 2012-2028 жылдар аралығында «ҚТЖ» ҰК» АҚ үшін 267 жүк және 95 жолаушылар электровоздары мен олардың компоненттерін шығаруға мүдделілік танытып отыр. Электровоздарға 25 жыл бойы сервистік қызмет көрсететін болады.
Осыған орай Альстом Қазақстанда 4 сервис орталығын салу жобасын жүзеге асыруда. 2027 жылға дейінгі уақытты қамтитын жоба құны 50 млн еуро шамасын құрап отыр. Бұл орталықтар жүк және жолаушылар электровоздарына үздіксіз қызмет көрсетумен қатар сервистік қызмет көрсетілімін жерсіндіруді дамытпақ. Және де 700 қосымша жұмыс орнының ашылуына мүмкіндік береді. Кездесу барысында тараптар тартымдық жылжымалы құрамды жаңарту бойынша ынтымақтастықты, сондай-ақ ұзақ мерзімді келісімшарт жасасудың негізгі шарттарын талқылады. Атап айтқанда, 2029-2036 жылдар аралығында «ҚТЖ-Жүк тасымалы» ЖШС үшін KZ6A сериялы 205 алты осьті электровозды сатып алуға келісімшарт жасасу қарастырылуда. Электровоздарды «Электровоз құрастыру зауыты» ЖШС жасап шығармақ. Жаңа типті KZ6A сериялы жүк электровозы 40% арзан және электр қуатын 20% аз тұтынады. Бұл локомотивтер ТХКБ – Орта жол дәлізін контейнерлендіруге қолдау көрсететін болады.