Қазақстан мен Грекия логистика саласындағы әріптестікті нығайтуда
Қазақстан мен Грекия көлік және логистика бағытында ынтымақтастықты кеңейтіп келеді. Жақында Қазақстан Республикасының Афинадағы Елшілігінің ұйымдастыруымен қазақстандық көлік саласының өкілдерінен құралған делегация Грек Республикасына ресми сапар жасады, деп хабарлайды Rail-news.kz.
Делегация құрамында ҚР Көлік министрлігінің Теміржол және су көлігі комитеті, Ақтау халықаралық теңіз сауда порты, «Қазмортрансфлот» АҚ, «Кедентранссервис» АҚ, «Kaspi Grain Way» ЖШС және «Kazakh Invest» ұлттық компаниясының өкілдері болды.
Бұл сапар 2024 жылғы қарашада Бакуде өткен COP-29 конференциясы аясында Қазақстан Президенті Қасым-Жомарт Тоқаев пен Грекия Премьер-министрі Кириакос Мицотакис арасында жасалған уағдаластықтарды жүзеге асыру мақсатында ұйымдастырылды. Екі тарап тиімді бірлескен инфрақұрылымдық жобаларды қолға алып, көлік-логистика саласындағы әріптестікті жандандыруға ниетті екенін білдірді.
Кездесулер барысында Транскаспий халықаралық көлік дәлізін Грекияның көлік және порт инфрақұрылымымен байланыстыру, кадрлар даярлау, порттарды жаңғырту, шетелдік инвестициялар тарту және мультимодальды логистикалық сервистер құру мәселелері қаралды. Грек тарапымен бірлесіп өткен дөңгелек үстелде қазақстандық делегация Каспий теңізіндегі перспективалық жобалармен таныстырды.
Делегация Грекияның Ұлттық инвестициялық қоры – Growthfund PPF, сондай-ақ жетекші Navios Maritime Holdings және Tsakos Group компанияларының басшылығымен кездесулер өткізді. Сонымен қатар делегация Пирей портына барып, Skaramangas және Elefsis кеме жасау зауыттарының мүмкіндіктерімен танысты. POLYECO компаниясының экологиялық технологиялары – мұнай төгінділерін тазалау мен қалдықтарды өңдеу жүйелері де ерекше назар аудартты.
Сапар аясында Грекия Сыртқы істер министрлігінің өкілдерімен және басқа да салалық ведомстволармен келіссөздер жүргізіліп, «Каспий – Қара теңіз – Жерорта теңізі» бағытындағы көлік маршруттарын Еуропалық көлік желісіне кіріктіру мәселесі талқыланды. Грекия СІМ Бас хатшысы Димитрис Скалкос Транскаспий дәлізінің Балқан аймағымен байланыс орнатудағы маңызын атап өтті.
Қазақстан делегациясының басшысы, ҚР Көлік министрлігі Теміржол және су көлігі комитеті төрағасының орынбасары Қасым Тілепов бұл бағыт Қазақстан үшін экспорт нарығын әртараптандырудың маңызды тетігі екенін атап өтті. Ол грек компанияларын порт және логистикалық инфрақұрылымды дамыту жобаларына қатысуға шақырды.
Қазақстанның Грекиядағы Елшісі Тимур Сұлтанғожин екі елдің де аймақтық хаб ретіндегі рөлін атап өтіп, бірлескен жобаларды іске асыруға үлкен мүмкіндік бар екенін жеткізді.
Сапар нәтижесінде салалық мекемелер мен іскер топтар арасында тікелей байланыс орнап, институционалдық серіктестік жаңа деңгейге көтерілді. Бұл қадам екі ел арасындағы логистика, көлік және жасыл технологиялар саласындағы ынтымақтастықты тереңдетуге негіз қалайды.