Заманауи маневрлік тепловоздар жеткізілді
«Қазақстан теміржолшысы» газетінің тілшісі
Астана локомотив пайдалану депосы Қытайда жасалған жаңа маневрлік локомотивтермен толықты. Осыған орай «Қазақстан темір жолы» ҰК» АҚ мен China Railway Rolling Stock Corporation (CRRC) корпорациясы арасындағы негіздемелік келісім шеңберінде заманауи маневрлік тепловоздарды қабылдау бойынша салтанатты жиын өтті.
100 маневрлік тепловозды жеткізу туралы келісімге 2023 жылғы 17 қазанда ҚР Президенті Қасым-Жомарт Тоқаевтың Қытай Халық Республикасына мемлекеттік сапары барысында қол қойылған болатын. Соның негізінде Астана депосына әзірге екі локомотив әкелінді. Оның лентасын кесу құрметі депода көп жылдар жұмыс істеген және биыл жұмыс беруші зейнеткерлік жасқа толғанға дейін төлейтін салалық жәрдемақыға шығатын құрметті машинистер Нұрбек Сембиев пен Серкебай Майкеновке берілді. Машинистердің айтуынша, жаңа локомотивтер жайлылықтың жоғары деңгейімен ерекшеленеді.
– 20 жыл машинист болып еңбек еттім. Маневрлік жұмыстарға арналған бұл локомотив қазіргі заманға сай жасалған, бұрынғы біздегі ескі, кеңестік түрлеріне қарағанда дизайны да, қуаттылығы да күштірек. Тепловоз техникалық паркте, станция басында жұмыс істейді. Кабинада тағамды жылытуға арналған плита, ауа баптағыш және тоңазытқыш бар, бұл жұмыс жағдайын едәуір ыңғайлы етеді, – дейді машинистердің бірі Нұрбек Сембиев.