Кәсіби мамандарға құрмет
«Қазақстан теміржолшысы» газетінің тілшісі
«ҚТЖ» ҰК» АҚ-ның сенімді серіктестерінің бірі «Қамқор Локомотив» ЖШС-нің үш қызметкері «Үздік еңбек адамы» төсбелгісіне ие болды.
Бұл – Жұмысшы мамандықтары жылы аясында еңбек адамдарына көрсетіліп отырған құрмет пен сенімнің бір көрінісі. Өндіріс игілігі үшін адал тер төгіп жүрген жандарға алғыс білдірудің тамаша мүмкіндігі.
«Bilim-orkenieti» ұлттық инновациялық ғылыми-зерттеу орталығы мен «Жаңа Қазақстан» инновациялық орталығы бірлесе отырып ұйымдастырған «Еңбек озаты» атты республикалық патриоттық байқаудың да көздегені осы – жұмысшы мамандықтарының мәртебесін көтеру. Елімізде адал еңбек етіп, өз мамандығының хас шебері атанған және елдің дамуына үлес қосып жүрген азаматтарды қоғамда кеңінен насихаттау және жастарға үлгі ету.
Екі кезеңнен тұрған байқау нәтижесінде «Қамқор Локомотив» ЖШС қызметкерлері жеңімпаздар қатарынан орын алды. Олар: Ақтөбе ЛЖД жабдықтарды жөндеу жөніндегі слесарь-электригі Руслан Жаңабергенов, Шалқар СО жылжымалы құрамды жөндеу электр слесарі Ерлан Раев, Аягөз ЛЖД жылжымалы құрамды жөндеу слесарі Аманғазы Рахымжанов.
«Үздік еңбек адамы» құрметті төсбелгісінің иегерлеріне дипломдар мен естелік мүсіндер тарту етілді.