Нұрлан Жақыпов Alstom компаниясымен әрі қарайғы серіктестікті талқылады
Қор басшысы және Alstom компаниясының топ-менеджері электровоздарды жеткізу бойынша әрі қарайғы серіктестікті талқылады, деп хабарлайды Rail-news.kz.
«Самұрық-Қазына» басқарма төрағасы Нұрлан Жақыпов Alstom компаниясының Африка, Таяу Шығыс және Орталық Азия аймағы бойынша президенті Мартан Вожурмен кездесті.
Францияның Alstom компаниясы – ҚР Президенті жанындағы Шетелдік инвесторлар кеңесінің бақылаушысы.
«Alstom мен «Қазақстан темір жолының» серіктестігі сәтті дамып жатқанын атап өткім келеді. Бұл Қазақстанға Орталық Азиядағы машина құрастыру саласының көшбасшысы ретінде позициясын нығайтуға ықпал етті», – деді Жақыпов.
Alstom – Қордың көпжылдық серіктесі. «Самұрық-Қазынаның» сатып алу жүйесінің арқасында, атап айтқанда офтейк-келісімшарттар жасау мүмкіндігі арқылы компания «Электровоз құрастыру зауытында» сәтті жұмыс атқарып келеді.
Зауытта жүк тасымалына арналған магистральді KZ8A, AZ8A электровоздары және жолаушыларға арналған KZ4AT электровоздары шығарылады. Жоба басталған кезде шамамен 10% болған жергілікті қамту үлесі бүгінде 35%-ға дейін артты.
Сондай-ақ, Alstom Астанада Орталық Азия мен Кавказ елдеріне қызмет көрсетуге арналған басты сервистік орталықты салып жатыр.
Alstom (Франция) – теміржол көлігі саласындағы әлемдік жетекші өндірушілердің бірі. Компания Қазақстанда 2010 жылдан бері жұмыс істеп келеді және 1 000-нан астам қызметкері бар (7 өндірістік нысаннан тұратын) ірі өнеркәсіптік базаны құрды.