ҚТЖ басқарма төрағасы қызметкерлерді теміржолшылар күнімен құттықтады
«Қазақстан темір жолы» ҰК» АҚ Басқарма төрағасы Талғат Алдыбергенов қызметкерлерді теміржолшылар күнімен құттықтады, деп хабарлайды Rail-news.kz.
Сіздерді Теміржолшылар күнімен шын жүректен құттықтаймын!
Биылғы жылы тамыздың алғашқы жексенбісі ежелден қалыптасқан дәстүр бойынша тек теміржолшыларға тиесілі – ресми түрде Теміржол көлігі қызметкерлері күні болып жарияланды. Бұл – теміржолшы кәсібінің тарихына тағзым және бүгінгі күні осы мамандықты игеріп, отандық теміржол саласының дамуы жолында аянбай еңбек етіп жатқан жандарға құрмет деп білемін.
Қазақстанның халықаралық логистикалық тізбектерде негізгі буын болуға, оның әлемдік деңгейге шығуына барлық мүмкіндік бар. Сіз бен біздің міндетіміз – осы абыройлы миссияны жүзеге асыру жолында ерен еңбек үлгісін танытып, сенім үдесінен шыға білу. Алдыңғы буын ағалар салып кеткен сара жолды жалғастырып, тәуелсіз Қазақ елінің көлік-логистикалық саласын жоғары деңгейге жеткізу.
Бүгінгі кәсіби мереке күні, осы мақсат пен мүдде жолында аянбай тер төгіп жүрген барша әріптестерімді, сонымен қатар саналы ғұмырын осы саланың дамуы мен өркендеуі жолына сарп еткен ардагерлерді тағы да құттықтап, мықты денсаулық, қажымас қайрат, мәнді де мағыналы ғұмыр тілеймін!