ҚТЖ техниканы жаңғыртуға және еңбек жағдайларын жақсартуға инвестиция салады
"Қазақстан темір жолы" ҰК" АҚ магистральдық теміржол желісі объектілерін дамытудың 2030 жылға дейінгі ауқымды бағдарламасын іске асыруда, деп хабарлайды Rail-news.kz.
Бағдарлама мақсаты – техникалық базаны жаңғырту, операциялық тиімділікті арттыру және теміржол саласы қызметкерлерінің еңбек жағдайларын жақсарту.
Бүгінгі таңда 16 бірлік мамандандырылған жол техникасы сатып алынды. Жыл соңына дейін тағы үш электр балластері мен 90 бірлік хоппер-дозатрлық вагондар жеткізіледі деп күтілуде, бұл өндірістік қуаттылықты едәуір күшейтуге және теміржол инфрақұрылымын ұстап тұру сапасын арттыруға мүмкіндік береді.
Еңбек жағдайларын жақсарту және жұмыс процестерін ұйымдастыру жөніндегі іс-шаралар шеңберінде бригадаларды жөндеу-қалпына келтіру жұмыстарын орындау орындарына жеткізу үшін 117 көлік құралы сатып алынды. Персоналды жедел тасымалдау үшін жылына 4 бірлік МПТ-6 мотовозы сатып алынады. Мұндай мотовоздардың әрқайсысы 22 адамға дейін тасымалдауға арналған.
Техникалық қызмет көрсетуге және техниканың қызмет ету мерзімін ұзартуға ерекше назар аударылады. Жыл сайын 715 бірлік мамандандырылған техникаға, 815 автотракторлық машинаға және 1800 жуық шағын механикаландыру бірлігіне жоспарлы жөндеу жүргізіледі.
Ағымдағы жылы өндірістік базаны нығайту үшін Ақтөбе қаласында орналасқан жаңа Ақтөбе машиналандырылған жол дистанциясы құрылды. Жаңа орталық логистикалық шығындарды қысқартуға, ресурстарды жұмыс орындарына жақындатуға және өндірістік міндеттерді орындауды жеделдетуге мүмкіндік береді. Жаңа бөлімшенің ашылуы өңірлік инфрақұрылымды дамытуға және қосымша жұмыс орындарын құруға серпін береді.
"ҚТЖ" ҰК" АҚ өндірістік базаны жаңғырту бойынша жүйелі жұмысты жалғастырады. Бұл қадамдар теміржол тасымалының сенімділігі мен қауіпсіздігін арттыруға, сондай-ақ еңбекке қолайлы жағдай жасауға бағытталған.