Қазақстан 456 локомотив сатып алады
Үкімет отырысында көлік министрі Нұрлан Сауранбаев теміржол локомотивтері паркін жаңарту туралы айтып берді, бүгінгі таңда локомотивтер паркі 1,9 мың бірлікті құрайды, деп хабарлайды Rail-news.kz.
«Жаңарту бағдарламасына сәйкес, 2029 жылға дейін барлығы 456 локомотив сатып алу жоспарлануда. Локомотивтерді жеткізушілер – қазақстандық «Электровоз құрастыру зауыты», «Локомотив құрастыру зауыты» және Қытайдың CRRC компаниясы», — деді көлік министрі.
АҚШ-тың Wabtec компаниясының деректері бойынша, қазіргі уақытта Қазақстанда қолданыстағы жүрген локомотивтер заманауи және тиімді техникалар, олар болашақтың тасымал талаптарына толық сәйкес келеді.
Сонымен қатар ол жүк операторлары 7 мыңнан астам жаңа вагондар сатып алуды жоспарлап отырғанын жеткізді.
Қазақстанда 300-ден астам теміржол операторы жұмыс істейді. Олардың қол астында 142 мың жүк вагоны бар. Бұл туралы көлік министрі Нұрлан Сауранбаев Үкімет отырысында хабарлады. Оның айтуынша, бұл қазіргі жүк тасымалының қажеттілігін толық қамтиды.
Оның ішіндегі «Қазақстан темір жолы» ұлттық компаниясының үлесі – 41%, әрі бұл вагондар әлеуметтік маңызы бар бағыттарда белсенді қолданылады.
«2029 жылға дейін жүк операторлары тарапынан 7 мыңнан астам жаңа вагондар сатып алынады. Бұл жүк тасымалының өсіп келе жатқан әлеуетін сақтап, дамытуға мүмкіндік береді», — деді Нұрлан Сауранбаев.