ҚТЖ сатып алу жүйесіне жасанды интеллект енгізіп, отандық өндірісті қолдайды
«Burabay Express» электропойызында журналистермен кездесу өтті. Жиын «Қазақстан темір жолы» ҰК» АҚ-ның сатып алу қызметіне арналды. Жаңа жобалар жөніндегі басқарушы директор Илья Мещеряков атап өткендей, бүгінгі таңда ҚТЖ-ның сатып алулары компанияны қажетті тауарлармен, жұмыстармен және қызметтермен қамтамасыз етумен қатар, Қазақстан экономикасын дамытудың құралына айналып отыр, деп хабарлайды Rail-news.kz.
ҚТЖ қазақстандық қамтуды дамыту мен импортты алмастыруға басымдық беруде. 2025 жылы компания отандық кәсіпорындармен 1 400-ден астам келісімшартқа және 87 млрд теңгеден асатын сомаға 17 оффтейк-келісімшартқа қол қойды. Соңғы бес жыл ішінде жалпы сомасы 250 млрд теңгеге оффтейк-келісімшарттар жасалып, бұл жаңа өндірістерді іске қосуға және өңірлерде жұмыс орындарын ашуға мүмкіндік берді.
«Біз сатып алуды отандық өндірушілерді қолдау тетігі ретінде қарастырамыз. Қазақстандық кәсіпорындардың сатып алуға қатысуы және қаражаттың ел экономикасында қалуы біз үшін маңызды», — деді Илья Мещеряков.
Заманауи категориялық тәсіл 48 млрд теңге үнемдеуге мүмкіндік берді.
ҚТЖ техникалық тапсырмаларды талдап, оларды нормативтік құжаттарға сәйкестігін тексеретін жасанды интеллектті белсенді енгізуде. Бұл жемқорлық тәуекелдерін болдырмауға, тендерлік рәсімдерді жеделдетуге және сатып алудың ашықтығын арттыруға жағдай жасайды. Жасанды интеллект ҚТЖ-ның күнделікті жұмысының бір бөлігіне айналып, компанияның тиімділігін арттыруға көмектесуде.
2025 жылы компания медициналық қызмет көрсету саласындағы стратегиясын жаңартып, медициналық тексерістерді цифрландыруды, жеткізушілер үшін KPI енгізуді және ұзақмерзімді келісімшарттар жүйесін іске асырады. Бұл қазақстандық өндірушілер үшін жұмыс істеудің неғұрлым тұрақты жағдайын қалыптастырады және компания қызметкерлерінің әлеуметтік стандарттарын арттырады.
ҚТЖ-ның сатып алу саясаты — бұл тек қаржы үнемдеу ғана емес, сондай-ақ отандық өндірісті дамытуға, жаңа жұмыс орындарын ашуға және болашақ технологияларын енгізуге қосқан үлес.