Теміржолшылар экологиялық акцияны белсенді қолдады
«Таза Қазақстан» республикалық экологиялық акциясы аясында теміржол көлігі қызметкерлері аумақтарды абаттандыру және көгалдандыру бойынша іс-шараларға белсене қатысуда.
Акция Мемлекет басшысының бастамасы аясында өтіп, қоғамның экологиялық мәдениетін жақсартуға, тазалық пен қоршаған ортаны қорғау мәселелеріне назар аударуға бағытталған.Теміржолшылар әлеуметтік маңызы бар игі-істерді қолдауды дәстүрге айналдырған. Бұл жолы да «ҚТЖ» ҰК»АҚ филиалдары мен бөлімшелерінің ұжымдары акцияны қолдап, 1274 сенбілік өткізді. Тек теміржолға қатысты мекемелер аумағы ғана емес, сонымен қатар қоғамдық саябақтар, аллеялар, су айдындарының маңы тазаланып, рұқсат етілмеген қоқыс орындары жойылды. Жалпы көлемі 1484 тоннадан аса қоқыс жиналды.
Компаниямызды көгалдандыруға ерекше назар аударылып отыр. Бірқатар өңірлерде компания қызметкерлері көлік магистральдарының бойына, станциялар мен әлеуметтік нысандардың маңына 9937 ағаш көшеттерін отырғызды. Бұл ағаш отырғызылған аумақтың тек көркі ғана емес, сонымен қатар шаң мен шуға қарсы тосқауыл. Қазан айынан бастап тағы 120000 ағаш көшеттерін отырғызу жоспарда бар.
«Таза Қазақстан» – бұл бір реттік акция емес, табиғатқа ұқыпты қарау мәдениетін қалыптастыру жөніндегі жүйелі жұмыстың маңызды бөлігі. Теміржолшылардың акцияға белсене қатысуы, әрбір еңбек ұжымының елдің тазалығы мен экологиялық қауіпсіздігін сақтауға нақты үлес қоса алатынын көрсетеді. «ҚТЖ» ҰК» АҚ алдағы уақытта да қоршаған ортаны қорғауға, халықтың өмір сүру сапасын жақсартуға және «жасыл экономиканы» дамытуға бағытталған бастамаларды қолдауға ниетті.
Рахат НИГМЕТОВА,
«ҚТЖ» ҰҚ» АҚ – «Көпсалалы қызмет көрсету орталығы»
филиалының Еңбек қауіпсіздігі және экология инспекциясы
бас менеджері