Биыл «ҚТЖ» отандық жеткізушілермен 87,6 млрд теңгеге келісімшарттар жасасты
«Самұрық-Қазына» қорының портфельдік компаниялары отандық тауар өндірушілермен дөңгелек үстелдер өткізіп, қордың сатып алуларына қатысу рәсімдерін және отандық тауар өндірушілерді қолдау шараларын түсіндіруде, деп хабарлайды Rail-news.kz.
Отандық өндірісті қолдау аясында 2025 жылы «ҚТЖ» компаниялары тобы отандық тауар өндірушілермен 1 400-ден астам шарт жасасты. Қазіргі уақытта жалпы құны 2,8 трлн теңге болатын 185 ұзақ мерзімді келісімшарт күшіне енген.
Соңғы бес жылда импортты алмастыру бағдарламасы бойынша 250 млрд теңгеден астам сомаға офтейк-келісімшарттарға, оның ішінде 2025 жылы – 87,6 млрд теңгеге 17 келісімшартқа қол қойылды.
«Самұрық-Қазына» компаниялары тобы отандық өндірісті дамыту және импортқа тәуелділікті азайту бағытында жұмыстарды тұрақты түрде жүргізіп келеді.