Қазақстан мен Грузия Транскаспий дәлізін дамыту мәселесін талқылады
Көлік вице-министрі Максат Қалиақпаров Грузияның Инфрақұрылым министрінің бірінші орынбасары Вахушти Багратиони және Грузияның Қазақстандағы елшісі Леван Диасамидземен кездесті, деп хабарлайды Rail-news.kz.
Тараптар транзиттік дәліздерді дамыту, көлік инфрақұрылымын жетілдіру және салалық ведомстволар арасындағы тәжірибе алмасу мәселелерін талқылады. Әсіресе Еуропа мен Азияны байланыстыратын Орта дәліздің маңызына назар аударылды.
Мақсат Қалиақпаров Қазақстанның ынтымақтастықты кеңейтуге мүдделі екенін атап өтсе, Вахушти Багратиони транзит саласында Қазақстанды стратегиялық әріптес ретінде жоғары бағалады.
Тараптар бірлескен жобаларды жүзеге асыруға ниетті.
Айта кетсек, Грузияның Поти портында Транскаспий халықаралық көлік бағытының маңызды бөлігі саналатын бірінші қазақстандық мультимодальды терминал жұмыс істеп тұр. Нысан Қытай, Қазақстан, Каспий теңізі, Әзербайжан, Грузия әрі қарай Еуропа елдерін жалғайтын Орта дәліздің бөлігіне айналды.
Поти порты — Ресейді айналып өтетін транзиттік маршрут құрылысының маңызды буыны. 2024 жылы контейнер айналымы 545 297 TEU-ға жеткен.