Темір жолдар мен тағдырлар: Алматыда «Жолдар» телехикаясының түсірілімі басталды

Алматы қаласында «Жолдар» атты жаңа көркем телехикаяның түсірілімі басталды. Жоба Еңбек адамдары мен теміржолшылар жылына орай, «Хабар» телеарнасы мен «Jana Media» кинокомпаниясының бірлесуі арқылы, сондай-ақ «Жолаушылар тасымалы» АҚ мен «Қазақстан темір жолы» ҰК» АҚ қолдауымен жүзеге асырылып жатыр, деп хабарлайды Rail-news.kz.

Телехикаяның негізгі мақсаты – теміржол саласы мамандықтарының маңызын айқындап, осы сала қызметкерлерінің еңбегін көпшілікке кеңінен таныстыру. Көрермендер пойыз бригадаларының, машинистердің, жолсеріктердің, кассирлердің, жолшылардың, диспетчерлер мен өзге де теміржолшылардың күнделікті өмірі мен еңбегіне куә болады.

Түсірілімдер теміржол инфрақұрылымы нысандарында өтіп, оған сала мамандары тікелей қатысуда. Бұл телехикаяға барынша шынайылық беріп, оның әлеуметтік маңызын арттыра түседі.

«Жолдар» – тәуелсіздік дәуіріндегі қазақстандық теміржолшылардың тағдыры мен еңбегін арқау еткен тұңғыш көркем телехикая. Ол олардың ел дамуына қосқан өлшеусіз еңбегін айқын көрсетеді», – деді «Жолаушылар тасымалы» АҚ баспасөз хатшысы Нариман Дюсекеев.

Ұлттық тасымалдаушы «Хабар» мен «Jana Media» шығармашылық тобына көрсеткен бастамасы мен теміржолшы мамандығының беделін арттыруға қосқан үлестері үшін алғыс білдіреді.

Көптен күткен телехикая жақын күндері эфирге жол тартады.