Қазақстан мен Қытай 2026 жылға арналған тасымалдау перспективаларын талқылады
Алматыда Қазақстан Республикасы мен Қытай Халық Республикасының Шекаралық темір жолдары аралас комиссияларының 34-ші отырысы өтті, деп хабарлайды Rail-news.kz.
Кездесуде Қазақстан мен Қытай арасындағы жүк және контейнерлік тасымалдардың қорытындысы шығарылды. 2025 жылдың сегіз айында тасымалдау көлемі 23,2 млн тоннаны құрады, бұл 2024 жылдың сәйкес кезеңі көрсеткішінен 10% артық. Ағымдағы жылдың соңына дейін тараптар тасымалдау көлемін 35 млн тонна деңгейінде орындауды қамтамасыз етуге келісті, бұл өткен жылғы деңгейден 3,6 млн тоннаға артық. Сондай-ақ, 2026 жылға арналған тасымалдаудың алдын ала болжамды көлемі талқыланды.
Қазақстандық өнім экспортын ұлғайту мәселелеріне ерекше назар аударылды. Астық тасымалдаушыларда, жабық вагондарда және контейнерлерде астық жүктерін, сондай-ақ флекситанкалардағы контейнерлерде өсімдік майын тасымалдауды кеңейту жөніндегі шаралар тиеудің қажетті шарттарын сақтай отырып келісілді.
Тараптар тасымалдау құжаттарын ресімдеу, түйісу станцияларында ақпарат алмасу, сондай-ақ кедендік рәсімдерді жеделдету кезінде қағазсыз технологияларды енгізу саласындағы ынтымақтастықты дамытуға уағдаласты.
Бұдан басқа, 2025 жылғы желтоқсаннан бастап ҚР мен ҚХР шекаралық станциялары арасында пойыздарды, вагондар мен жүктерді қабылдау-беру үшін ауысым қызметкерлерінің келуін ұйымдастыру туралы уағдаластыққа қол жеткізілді. Бұл шара тасымалдау процесінің тиімділігін арттыруға және пойыздарды өңдеу уақытын қысқартуға мүмкіндік береді.
Отырыс қорытындысы бойынша тиісті хаттамаға қол қойылды.