Jibek Joly туристік пойызы келесі сапарға дайындалуда
24-30 қазан аралығында Jibek Joly 6.0 туристік пойызының кезекті сапары басталады. Маршрут Алматы – Түркістан – Отырар – Самарқан – Бұқара – Ташкент – Алматы қалаларын қамтып, Ұлы Жібек жолының ірі мәдени орталықтарын тоғыстырады, деп хабарлайды Rail-news.kz.
Жоба Қазақстан мен Өзбекстанның жетекші туроператорларының серіктестігі аясында жүзеге асып, өңірдің тарихи-мәдени мұрасын дәріптеуге, орнықты туризмді дамытуға және халықаралық ынтымақтастықты кеңейтуге бағытталған.
Бағдарламаға ЮНЕСКО-ның Бүкіләлемдік мұра тізіміне енген ескерткіштер мен тарихи нысандарды аралау, сондай-ақ кәсіби гидтер мен дәстүрлі өнер шеберлерінің қатысуымен өтетін мәдени іс-шаралар енгізілген.
Саяхат заманауи жайлы вагондарда ұйымдастырылып, туристердің қауіпсіздігіне, қолайлылығына және ұлттық қонақжайлылық атмосферасына ерекше көңіл бөлінеді.
Jibek Joly жобасы мәдени бағыттарды қайта жаңғыртудың жарқын үлгісіне айналып, қазақстандықтармен қатар шетелдік қонақтардың да қызығушылығын тудырып отыр. Жаңа маусым бұл дәстүрді жалғастырып, Ұлы Жібек жолы аймағының өркениеттік мұра орталығы ретіндегі маңызын тағы бір мәрте айқындайды.