Өндіріс көлемін арттыруда
«Қазақстан теміржолшысы» газетінің тілшісі
ҚТЖ-ның конструкторлық-эксперименттік орталығы жыл сайын өндіріс көлемін 10-15% арттырып отыр. Теміржолдың негізгі салаларын – жол дистанциясын, рельсті дәнекерлеу кәсіпорындарын, дабыл, байланыс және электрмен жабдықтау қызметтерін жабдықтармен қамтамасыз ететін орталықтың өзектілігі арта түсуде.
Конструкторлық-эксперименттік орталық 40 жылдан астам уақыт бұрын Ақмола жол бөлімшесінің жол-эксперименттік шеберханасы ретінде құрылған. КЭО ретінде 1998 жылы қайта құрылып, жұмысын жалғастырып келеді. Орталық бастапқыда ТЭД-30 және ТЭД-40 домкраттарын жөндеумен айналысып, уақыт өте келе өндірілетін өнімнің номенклатурасы мен күрделілігін едәуір кеңейтті.
Орталықта еңбек ететін 62 адамның 50-і – өндірістік персонал. Ауданы 1 864 шаршы метр өндірістік базаға темір ұстасы, токарь, механикалық құрастыру, ағаш өңдеу, электр цехы және басқа жеті цех орналасқан. Онда 48 металл өңдеу және металл кесу станоктары орнатылған. Бүгінде КЭО жол машиналарына, рельстік платформаларға, хоппер-диспенсер механизмдеріне және қар тазалау техникасына арналған жабдықтарды өндіруге және жөндеуге бейімделген.
Сондай-ақ кәсіпорын шағын механикаландыруды – домкраттарды, үдеткіштерді, шекімелеушілерді, порталдық крандарды да жөндейді. Орталық жол құралдарын, типтік емес техникалық құралдарды, жабдықтар мен қосалқы жабдықтарды дайындауға тапсырыстарды орындайды, жаңа құрылғыларды монтаждау мен сынау кезінде техникалық қолдау көрсетеді.