ҚТЖ делегациясы АҚШ-тың темір жол нысандарын аралады
Америка Құрама Штаттарына жұмыс сапары аясында "ҚТЖ "ҰК" АҚ басқарма төрағасы Талғат Алдыбергенов АҚШ-тың ең ірі темір жол компанияларының бірі - Norfolk Southern Corporation басшылығымен кездесіп, оның негізгі инфрақұрылымдық нысандарын аралады, деп хабарлайды Rail-news.kz.
Сапар барысында ҚТЖ делегациясы тасымалдауды басқарудың орталық диспетчерлік орталығының жұмысымен танысты, сондай-ақ компанияның операциялық нысандары - Атланттағы Inman Yard сұрыптау станциясы мен контейнерлік жүктерді тиеп-түсіруді және өңдеуді қамтамасыз ететін Austell мультимодальды терминалында болды.
Көлік басқаруды цифрландыру, пойыздар қозғалысын жоспарлаудың зияткерлік жүйелерін енгізу, логистикалық тізбектердің тиімділігін арттыру және теміржол инфрақұрылымын дамыту саласында тәжірибе алмасу болды.
Сондай-ақ, ҚТЖ делегациясы американдық Wabtec Corporation компаниясының кеңсесінде болды. Кездесу барысында локомотив паркін жаңарту, қауіпсіздіктің инновациялық жүйелерін және қозғалысты басқарудың цифрлық платформаларын енгізу бойынша ынтымақтастық мәселелері талқыланды.
Norfolk Southern — Шығыс жағалауда тасымалдауды қамтамасыз ететiн және оны елдiң батыс магистральдарымен қосатын АҚШ-тың iрi темiржол жүк компанияларының бiрi. 1827 жылы құрылған, штаб-пәтері Атланта қаласында, Джорджия штатында орналасқан. Norfolk Southern темір жол желісі АҚШ-тың 22 штатында 31 000 шақырымнан астам жолды қамтиды. Компания 44 интермодальдық терминалды, желі бойындағы 782 өнеркәсіптік алаңды және 50-ден астам порттық логистикалық серіктестерді басқарады. Жылжымалы құрам 160 000-нан астам вагондарды (меншікті, жеке және жалға алынған), сондай-ақ өнеркәсіптік, ауыл шаруашылығы, энергетикалық, контейнерлік және автомобиль жүктерін тасымалдауға қызмет көрсететін локомотивтер паркін қамтиды.
Компания 260-тан астам серіктестік логистикалық бағыттарды қолдайды, жүк тиеуді және мультимодальдық тасымалды қамтамасыз етеді және Нью-Йорк, Чикаго, Атланта, Филадельфия, Жаңа Орлеан, Майами және т.б. қоса алғанда, АҚШ-тың ірі экономикалық орталықтары арасындағы жүк-көлік дәліздерінің негізгі операторы болып табылады.