ҚТЖ локомотив паркін ауқымды жаңартуға 1,6 млрд доллар тартты
Мемлекет басшысының АҚШ-қа ресми сапары аясында ҚТЖ локомотив паркін жаңартуға арналған 10 жылдық мерзімге 1,6 млрд доллар көлеміндегі қаржыландыруды тарту жөнінде маңызды Мандаттық келісімге қол қойылды. Wabtec компаниясының локомотивтерін жеткізу ұзақ мерзімді кезеңге – 2038 жылға дейін жоспарланған, деп хабарлайды Rail-news.kz.
Келісім «Қазақстан темір жолы» ұлттық компаниясы» АҚ мен қаржыландыруды үйлестіруші болып табылатын Citibank арасында жасалды. Бұл стратегиялық мәмілеге АҚШ-тың Экспорт-импорт банкі (US EXIM) кепілгер ретінде қолдау көрсетеді.
Локомотивтер Қазақстан аумағында – Wabtec Transportation Engines Holding B.V. компаниясының еншілес кәсіпорны саналатын Астанадағы «Локомотив құрастыру зауыты» АҚ-да өндіріледі.
Аталған сатып алу бағдарламасы тартқыш жылжымалы құрамды кешенді түрде жаңартуға бағытталған. Бұл жүк тасымалының артып келе жатқан қажеттіліктерін сенімді қамтамасыз етіп, тасымалдың энергия тиімділігін айтарлықтай арттыруға мүмкіндік береді.