«ҚТЖ» мен «РЖД» 2030 жылға дейін түйіспе бекеттерін дамыту туралы келісімге қол қойды
Қазақстан Президенті Қасым-Жомарт Тоқаевтың Ресей Федерациясына ресми сапары аясында «Қазақстан темір жолы» ұлттық компаниясы» АҚ мен «Ресей темір жолдары» ААҚ арасында 2030 жылға дейін мемлекетаралық теміржол түйіспе бекеттерін дамыту жөніндегі келісімге қол қойылды, деп хабарлайды Rail-news.kz сайты Ақордаға сілтеме жасап.
Құжатқа «ҚТЖ» АҚ басқарма төрағасы Талғат Алдыбергенов және «РЖД» бас директоры – басқарма төрағасы Олег Белозёров қол қойды.
Келісім шекара маңындағы инфрақұрылымды жаңғыртуға және жүк ағынының артуын ескере отырып, теміржол өткелдерінің өткізу қабілетін арттыруға бағытталған бірлескен жұмысты көздейді.
Тәуелсіздік жылдары ішінде Қазақстан мен Ресей арасындағы тоғыз мемлекетаралық өткізу бекеті арқылы үш миллиард тоннадан астам жүк тасымалданған.
2025 жылдың он айының қорытындысы бойынша екі ел арасындағы тасымал көлемі 71,6 миллион тоннаға жетіп, өткен жылмен салыстырғанда 5 пайызға артқан.
Қазақстан мен Ресей теміржол инфрақұрылымын дамыту бойынша бірлескен жобаларды жүзеге асырып келеді. Биыл Достық – Мойынты учаскесінде екінші жолдардың құрылысы аяқталып, шығыс бағытындағы өткізу мүмкіндігі айтарлықтай артты.
Сонымен қатар, цифрлық технологиялар белсенді енгізілуде. 2025 жылғы қазан айында электрондық, заңды күшке ие жүкқұжаттар арқылы тасымал көлемі 84 пайызға жетті. Бұл көрсеткішті 2026 жылы 90 пайызға дейін жеткізу жоспарланып отыр.